**(រាជធានីភ្នំពេញ)៖** នាព្រឹកថ្ងៃទី១៦ ខែមីនា ឆ្នាំ២០២៦ នៅវិមានសាមគ្គីភាព សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានអនុញ្ញាតជូន ឯកឧត្តម Danny Annan ឯកអគ្គរាជទូតនៃប្រទេសដាណឺម៉ាក ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ ដើម្បីពង្រឹងនូវចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែមានភាពរីកចម្រើនបន្ថែមទៀត។
ក្នុងជំនួបប្រកបដោយបរិយាកាសស្និទ្ធស្នាលនេះ ឯកឧត្តម Danny Annan បានសម្តែងនូវការគោរពដឹងគុណយ៉ាងជ្រាលជ្រៅបំផុតចំពោះ សម្តេចតេជោ ប្រមុខរដ្ឋស្តីទី ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបឯកឧត្តម និងសហការី ចូលជួបសម្តែងការគួរសមនាពេលនេះ។ ឯកឧត្តមឯកអគ្គរាជទូត ក៏បានពាំនាំនូវការសួរសុខទុក្ខពីសំណាក់ថ្នាក់ដឹកនាំនៃប្រទេសដាណឺម៉ាក ជូនចំពោះសម្តេចតេជោ និងបានកោតសរសើរដោយស្មោះចំពោះការអភិវឌ្ឍយ៉ាងរហ័សលើគ្រប់វិស័យរបស់កម្ពុជា ក្រោមមាគ៌ាដឹកនាំដ៏ប៉ិនប្រសប់។
ជាការឆ្លើយតប សម្តេចអគ្គមហាសេនាបតីតេជោ ហ៊ុន សែន មានប្រសាសន៍ស្វាគមន៍យ៉ាងកក់ក្តៅចំពោះ ឯកឧត្តម Danny Annan និងបានវាយតម្លៃខ្ពស់ចំពោះទំនាក់ទំនងជាប្រពៃណីដ៏ល្អរវាងកម្ពុជា និងដាណឺម៉ាក។ សម្តេចតេជោ ក៏បានថ្លែងអំណរគុណដល់រដ្ឋាភិបាល និងប្រជាជនដាណឺម៉ាក ដែលតែងតែផ្តល់ការគាំទ្រដល់ការអភិវឌ្ឍសង្គម-សេដ្ឋកិច្ចនៅកម្ពុជា នាពេលកន្លងមក ជាពិសេសលើវិស័យអប់រំ បរិស្ថាន និងកិច្ចសហប្រតិបត្តិការអភិវឌ្ឍន៍នានា។
ក្នុងឱកាសដដែលនោះ ភាគីទាំងពីរបានពិភាក្សាយ៉ាងស៊ីជម្រៅលើបញ្ហាតំបន់ និងអន្តរជាតិ ដែលជាប្រយោជន៍រួម ព្រមទាំងបានផ្លាស់ប្តូរយោបល់គ្នាអំពីកិច្ចសហប្រតិបត្តិការលើវិស័យសក្តានុពលនានា រួមមាន វិស័យថាមពលបៃតង ពាណិជ្ជកម្ម និងការវិនិយោគ។ សម្តេចតេជោ ប្រមុខរដ្ឋស្តីទី បានបញ្ជាក់ជូនឯកឧត្តមទូតថា កម្ពុជាជានិច្ចកាលតែងតែបើកចំហ និងស្វាគមន៍ចំពោះរាល់ការវិនិយោគពីប្រទេសដាណឺម៉ាក ដើម្បីជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋ។
ជំនួបពិភាក្សាការងារនេះ បានបញ្ចប់ទៅក្នុងបរិយាកាសយោគយល់ និងស្និទ្ធស្នាលបំផុត ដោយភាគីទាំងពីរបានប្តេជ្ញាចិត្តយ៉ាងមោះមុតក្នុងការបន្តថែរក្សា និងលើកកម្ពស់ទំនាក់ទំនងទ្វេភាគីឱ្យឈានដល់កម្រិតថ្មីមួយទៀត ដើម្បីសន្តិភាព ស្ថិរភាព និងវិបុលភាពសម្រាប់ប្រជាជាតិទាំងពីរ៕
