**(វ៉ាស៊ីនតោន)៖** ក្នុងសេចក្តីថ្លែងការណ៍ដ៏គួរឱ្យកត់សម្គាល់មួយតាមរយៈបណ្ដាញទំនាក់ទំនងសង្គម Truth Social កាលពីពេលថ្មីៗនេះ ឯកឧត្តម ដូណាល់ ត្រាំ (Donald Trump) ប្រធានាធិបតីសហរដ្ឋអាមេរិក បានគូសបញ្ជាក់យ៉ាងច្បាស់នូវគោលជំហររបស់រដ្ឋបាលលោក ក្នុងការចាត់វិធានការបង្ក្រាបលើរបបដឹកនាំនៃសាធារណរដ្ឋឥស្លាមអ៊ីរ៉ង់ ដោយលោកបានអះអាងថា ឥទ្ធិពលនៃរបបនេះកំពុងត្រូវបានលុបបំបាត់ជាបន្តបន្ទាប់ទាំងផ្នែកយោធា និងសេដ្ឋកិច្ច។
នៅក្នុងសារលិខិតជាសាធារណៈនោះ ឯកឧត្តមប្រធានាធិបតីបានមានប្រសាសន៍ថា៖ «យើងកំពុងស្ថិតក្នុងដំណើរការនៃការលុបបំបាត់របបភេរវកម្មអ៊ីរ៉ង់ឱ្យអស់ពីឫសគល់ មិនថាជាទិដ្ឋភាពយោធា សេដ្ឋកិច្ច ឬវិស័យផ្សេងៗទៀតនោះឡើយ។ ទោះជាយ៉ាងណាក៏ដោយ ប្រសិនបើលោកអ្នកតាមដានព័ត៌មានពីសារព័ត៌មាន ញូវយ៉ក ថែមស៍ (New York Times) ដែលកំពុងតែធ្លាក់ចុះប្រជាប្រិយភាពនោះ លោកអ្នកនឹងអាចយល់ច្រឡំថា យើងមិនទទួលបានជោគជ័យក្នុងបេសកកម្មនេះទេ»។
ឯកឧត្តម ដូណាល់ ត្រាំ បានបន្ថែមទៀតថា បច្ចុប្បន្នភាពនៃសមត្ថភាពការពារជាតិរបស់ប្រទេសអ៊ីរ៉ង់ រួមមានកងទ័ពជើងទឹក និងកងទ័ពជើងអាកាស ត្រូវបានចុះខ្សោយយ៉ាងខ្លាំង រហូតដល់បាត់បង់លទ្ធភាពប្រតិបត្តិការ។ លោកបានបញ្ជាក់ថា រាល់ប្រព័ន្ធកាំជ្រួចមីស៊ីល យន្តហោះគ្មានមនុស្សបើក (Drones) និងធនធានយោធាដទៃទៀត កំពុងត្រូវបានកម្ទេចជាបន្តបន្ទាប់ ហើយសូម្បីតែថ្នាក់ដឹកនាំនៃរបបនេះ ក៏កំពុងប្រឈមនឹងការវិនាសសាបសូន្យផងដែរ។
ពាក់ព័ន្ធនឹងយុទ្ធសាស្ត្រយោធា ឯកឧត្តមប្រធានាធិបតីបានសង្កត់ធ្ងន់ថា៖ «សហរដ្ឋអាមេរិកមានឥទ្ធិពលកម្លាំងបាញ់ប្រហារដែលមិនអាចប្រៀបផ្ទឹមបាន មានគ្រាប់រំសេវឥតកំណត់ និងមានពេលវេលាគ្រប់គ្រាន់ក្នុងការសម្រេចកិច្ចការនេះ។ សូមពិនិត្យមើលនូវអ្វីដែលនឹងកើតឡើងចំពោះក្រុមដែលបង្កអស្ថិរភាពទាំងនេះនៅថ្ងៃនេះ»។
ជាកិច្ចបញ្ចប់ ឯកឧត្តមបានរំលឹកជាប្រវត្តិសាស្ត្រថា របបដឹកនាំអ៊ីរ៉ង់បានបង្កវិនាសកម្មដល់ជីវិតមនុស្សស្លូតត្រង់នៅជុំវិញពិភពលោកអស់រយៈពេល ៤៧ ឆ្នាំមកហើយ។ ក្នុងនាមលោកជាប្រធានាធិបតីទី ៤7 នៃសហរដ្ឋអាមេរិក លោកចាត់ទុកបេសកកម្មក្នុងការបញ្ចប់ឥទ្ធិពលនៃរបបនេះថាជា កិត្តិយសដ៏ខ្ពង់ខ្ពស់បំផុតក្នុងតួនាទីជាមេដឹកនាំកំពូល ដើម្បីនាំមកនូវសន្តិភាព និងស្ថិរភាពយូរអង្វែងសម្រាប់សហគមន៍អន្តរជាតិ។
យោងតាមច្បាប់ស្តីពីរបបសារព័ត៌មាន និងក្រមសីលធម៌វិជ្ជាជីវៈ ខេភីឌីញូស សូមបន្តតាមដាននូវរាល់វិវត្តន៍ថ្មីៗនៃស្ថានភាពភូមិសាស្ត្រនយោបាយនេះ ដោយផ្អែកលើតុល្យភាពព័ត៌មាន និងការរក្សានូវសន្តិសុខសណ្តាប់ធ្នាប់សកលលោកជាចម្បង។
