(វ៉ាស៊ីនតោន)៖ បញ្ជាការដ្ឋានកណ្ដាលនៃកងទ័ពសហរដ្ឋអាមេរិក (CENTCOM) បានប្រកាសជាផ្លូវការនូវលទ្ធផលនៃប្រតិបត្តិការយោធាចុងក្រោយបង្អស់ ដោយបានវាយប្រហារកម្ទេចនាវាដាក់មីនចំនួន ១៦ គ្រឿងរបស់សាធារណរដ្ឋឥស្លាមអ៊ីរ៉ង់ នៅក្នុងតំបន់ក្បែរច្រកសមុទ្រហ័រមូស (Strait of Hormuz)។ ប្រតិបត្តិការនេះត្រូវបានធ្វើឡើងក្នុងគោលបំណងទប់ស្កាត់ការគំរាមកំហែងដល់សន្តិសុខនាវាចរណ៍ និងធានានូវសេរីភាពនៃការធ្វើដំណើរតាមផ្លូវទឹកអន្តរជាតិ ដែលជាសរសៃឈាមសេដ្ឋកិច្ចដ៏សំខាន់របស់ពិភពលោក។
យោងតាមសេចក្តីថ្លែងការណ៍របស់បញ្ជាការដ្ឋានកណ្ដាលអាមេរិក បានឱ្យដឹងថា ការសម្រេចចិត្តប្រើប្រាស់កម្លាំងបាយនេះ គឺដើម្បីឆ្លើយតបទៅនឹងសកម្មភាពបង្កហេតុ និងការប៉ុនប៉ងរំខានដល់ចរាចរណ៍នាវាដឹកជញ្ជូនទំនិញ និងថាមពលនៅក្នុងតំបន់យុទ្ធសាស្ត្រមួយនេះ។ អាមេរិកបានសង្កត់ធ្ងន់ថា ខ្លួននឹងមិនអនុញ្ញាតឱ្យមានសកម្មភាពណាដែលប៉ះពាល់ដល់ស្ថិរភាពនៃច្រកសមុទ្រហ័រមូសនោះឡើយ។
ស្របពេលជាមួយគ្នានេះ លោក ដូណាល់ ត្រាំ ប្រធានាធិបតីសហរដ្ឋអាមេរិក រួមជាមួយលោក ភីត ហេហ្កសេត (Pete Hegseth) រដ្ឋមន្ត្រីក្រសួងការពារជាតិ កាលពីថ្ងៃអង្គារកន្លងទៅ បានចេញមុខអះអាងពីភាពចាំបាច់នៃកិច្ចអន្តរាគមន៍យោធានេះ។ ថ្នាក់ដឹកនាំកំពូលទាំងពីររូបបានព្រមានយ៉ាងធ្ងន់ៗទៅកាន់ទីក្រុងតេហេរ៉ង់ ចំពោះការព្យាយាមប្រើប្រាស់យុទ្ធសាស្ត្រ “ចាប់ច្រកសមុទ្រហ័រមូសធ្វើជាចំណាប់ខ្មាំង” ដើម្បីគៀបសង្កត់សហគមន៍អន្តរជាតិ។
លោកប្រធានាធិបតី ត្រាំ បានបញ្ជាក់ថា សហរដ្ឋអាមេរិកត្រៀមខ្លួនជានិច្ចក្នុងការការពារផលប្រយោជន៍ជាតិ និងសន្តិសុខសកលលោក ដោយមិនរុញរាក្នុងការចាត់វិធានការឆ្លើយតប ប្រសិនបើអ៊ីរ៉ង់នៅតែបន្តសកម្មភាពអរិភាពរបស់ខ្លួន។ ដោយឡែក លោក ភីត ហេហ្កសេត បានបន្ថែមថា ប្រតិបត្តិការកម្ទេចនាវាដាក់មីនទាំង ១៦ គ្រឿងនេះ គឺជាសារព្រមានយ៉ាងច្បាស់លាស់ថា រាល់ការប៉ុនប៉ងរំខានដល់នាវាចរណ៍នឹងត្រូវទទួលរងនូវការឆ្លើយតបយ៉ាងម៉ឺងម៉ាត់បំផុត។
សូមបញ្ជាក់ថា ច្រកសមុទ្រហ័រមូស គឺជាចំណុចយុទ្ធសាស្ត្រដ៏មានសារៈសំខាន់បំផុតសម្រាប់វិស័យថាមពលសកល ដែលមានបរិមាណប្រេងប្រមាណ ២០% នៃតម្រូវការពិភពលោក ត្រូវបានដឹកជញ្ជូនឆ្លងកាត់ជារៀងរាល់ថ្ងៃ។ ការកើនឡើងនូវភាពតានតឹងរវាងមហាអំណាចអាមេរិក និងអ៊ីរ៉ង់នៅតំបន់នេះ កំពុងរុញច្រានឱ្យស្ថានភាពភូមិសាស្ត្រនយោបាយនៅមជ្ឈិមបូព៌ាកាន់តែមានភាពប្រែប្រួលខ្លាំង ដែលអាចជះឥទ្ធិពលដល់តម្លៃថាមពល និងស្ថិរភាពសេដ្ឋកិច្ចពិភពលោកទាំងមូល។
រហូតមកដល់ពេលនេះ ភាគីខាងអ៊ីរ៉ង់មិនទាន់មានប្រតិកម្មជាផ្លូវការជុំវិញការបាត់បង់នាវាទាំងនេះនៅឡើយទេ ខណៈដែលសហគមន៍អន្តរជាតិកំពុងតាមដានយ៉ាងយកចិត្តទុកដាក់ចំពោះការវិវត្តថ្មីៗនៃជម្លោះនេះ ដើម្បីជៀសវាងការផ្ទុះឡើងនៃសង្គ្រាមទ្រង់ទ្រាយធំក្នុងតំបន់៕
