[ភ្នំពេញ, ថ្ងៃទី០៦ ខែវិច្ឆិកា ឆ្នាំ២០២៦ | ម៉ោង ២០:១៥ យប់] –
ខេត្តព្រៃវែង៖ យោងតាមសេចក្តីរាយការណ៍ និងការលើកឡើងពីសំណាក់ប្រជាពលរដ្ឋដែលរស់នៅក្នុងភូមិចាម ឃុំចាម ស្រុកកំពង់ត្របែក បានបង្ហាញនូវកង្វល់ជាខ្លាំងពាក់ព័ន្ធនឹងសន្តិសុខ និងសណ្តាប់ធ្នាប់សាធារណៈ ដោយពួកគាត់បានស្នើសុំឱ្យអាជ្ញាធរមានសមត្ថកិច្ចមេត្តាចុះពិនិត្យសកម្មភាពនៅទីតាំង «កាស៊ីណូ ៣៣» ដែលស្ថិតនៅក្បែរច្រកទ្វេភាគីព្រំដែនស្វាយអាង៉ោង។
តាមប្រភពព័ត៌មានពីមូលដ្ឋានបានឱ្យដឹងថា ទីតាំងកាស៊ីណូខាងលើ ត្រូវបានគេសង្ស័យថាអាចនឹងមានការបង្កប់នូវសកម្មភាពល្បែងស៊ីសងខុសច្បាប់មួយចំនួន ជាអាទិ៍ ល្បែងជល់មាន់ អាប៉ោង និងប្រភេទល្បែងស៊ីសងផ្សេងៗទៀត ដែលផ្ទុយនឹងគោលការណ៍ច្បាប់ស្តីពីការគ្រប់គ្រងល្បែងពាណិជ្ជកម្ម និងគោលនយោបាយ «ភូមិ-ឃុំ-សង្កាត់ មានសុវត្ថិភាព» របស់រាជរដ្ឋាភិបាល។
ក្នុងន័យនេះ ប្រជាពលរដ្ឋបានគោរពស្នើសុំដល់ ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង ក៏ដូចជា លោកឧត្តមសេនីយ៍ទោ ឈឿន ប៊ុនឆន ស្នងការនគរបាលខេត្តព្រៃវែង និងបញ្ជាការដ្ឋានកងរាជអាវុធហត្ថខេត្ត មេត្តាចាត់តាំងមន្ត្រីជំនាញចុះស្រាវជ្រាវ និងផ្ទៀងផ្ទាត់សកម្មភាពជាក់ស្តែងនៅទីតាំងនោះ។ ការស្នើសុំនេះ គឺក្នុងគោលបំណងធានាឱ្យបាននូវការអនុវត្តច្បាប់ឱ្យបានត្រឹមត្រូវ និងការពារសុវត្ថិភាពជូនប្រជាពលរដ្ឋក្នុងមូលដ្ឋាន ជៀសវាងការកើតមាននូវបទល្មើសផ្សេងៗដែលផ្តើមចេញពីល្បែងស៊ីសង។
យោងតាមបទដ្ឋានគតិយុត្តជាធរមាន រាល់ការបើកដំណើរការអាជីវកម្មល្បែងពាណិជ្ជកម្ម ត្រូវតែអនុវត្តស្របតាមអាជ្ញាប័ណ្ណ និងបទបញ្ជាផ្ទៃក្នុងដែលកំណត់ដោយគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ក.ប.)។ ប្រជាពលរដ្ឋសង្ឃឹមយ៉ាងមុតមាំថា អាជ្ញាធរពាក់ព័ន្ធនឹងចុះពិនិត្យ ដើម្បីបំបាត់មន្ទិលសង្ស័យ និងមានវិធានការតាមផ្លូវច្បាប់ក្នុងករណីរកឃើញថាមានការលួចលាក់បើកល្បែងស៊ីសងខុសច្បាប់ដែលមិនមានក្នុងអាជ្ញាប័ណ្ណ។
សូមបញ្ជាក់ផងដែរថា ការពង្រឹងសន្តិសុខ និងការលុបបំបាត់ល្បែងស៊ីសងខុសច្បាប់ គឺជាអាទិភាពខ្ពស់បំផុតរបស់រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីលើកកម្ពស់ជីវភាពរស់នៅ និងភាពសុខសាន្តរបស់ប្រជាពលរដ្ឋនៅទូទាំងប្រទេស៕




















