[LOCATION] ភ្នំពេញ — ក្រសួងធម្មការ និងសាសនា នៃព្រះរាជាណាចក្រកម្ពុជា កាលពីថ្ងៃទី២២ ខែមេសា ឆ្នាំ២០២៦ បានចេញសេចក្តីថ្លែងការណ៍ផ្លូវការមួយ ដោយធ្វើការតវ៉ាយ៉ាងដាច់អហង្ការចំពោះវត្តមានរបស់អាជ្ញាធរ និងប្រជាជនថៃ ដែលត្រូវបានគេរាយការណ៍ថា បានបន្តរៀបចំពិធីបួងសួងបែបសាសនា និងសកម្មភាពផ្សេងៗទៀតនៅក្នុងតំបន់ប្រាសាទតាក្របី ដែលកម្ពុជាអះអាងថាជាដែនអធិបតេយ្យភាពរបស់ខ្លួន។
យោងតាមខ្លឹមសារនៃសេចក្តីថ្លែងការណ៍ កម្ពុជាបានសម្តែងការមិនពេញចិត្តជាខ្លាំងចំពោះការជួបជុំសាធារណៈ ការប្រកបពិធីកម្មសាសនា និងការសាងសង់ហេដ្ឋារចនាសម្ព័ន្ធរបស់ភាគីថៃនៅតំបន់នោះ។ ក្រសួងបានចាត់ទុកសកម្មភាពទាំងនេះថា ជាការរំលោភបំពានយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់កម្ពុជា ទោះបីជាមានការតវ៉ាជាបន្តបន្ទាប់ពីរាជរដ្ឋាភិបាលកម្ពុជាកន្លងមកក៏ដោយ។
ប្រភពដដែលបានគូសបញ្ជាក់ថា នៅថ្ងៃទី២២ ខែមេសា ឆ្នាំ២០២៦ នេះ មានវត្តមានមន្ត្រីជាន់ខ្ពស់ និងប្រជាជនថៃ បានមកធ្វើសកម្មភាពបួងសួងបែបជំនឿសាសនានៅប្រាសាទតាក្របី។ ក្រសួងធម្មការ និងសាសនា បានលើកឡើងថា វត្តមានរបស់មន្ត្រីជាន់ខ្ពស់ទាំងនោះ ហាក់បង្ហាញពីចេតនាពង្រឹងសកម្មភាពខុសច្បាប់ ដែលអាចធ្វើឱ្យប៉ះពាល់ដល់កិច្ចខិតខំប្រឹងប្រែងក្នុងការដោះស្រាយបញ្ហាព្រំដែនដោយសន្តិវិធី និងតាមរយៈការចរចា។
ពាក់ព័ន្ធនឹងទិដ្ឋភាពច្បាប់ ក្រសួងបានពន្យល់ថា សកម្មភាពរបស់ភាគីថៃគឺជាការរំលោភលើបទដ្ឋានអន្តរជាតិ និងកិច្ចព្រមព្រៀងនានា រួមមាន៖ សន្ធិសញ្ញាបារាំង-សៀម ឆ្នាំ១៩០៧, ផែនទីមាត្រដ្ឋាន ១:២០០ ០០០, អនុស្សរណៈនៃការយោគយល់គ្នា (MOU) ឆ្នាំ២០០០ និងគោលការណ៍នៃច្បាប់អន្តរជាតិ។ លើសពីនេះ សកម្មភាពទាំងនេះក៏ត្រូវបានគេមើលឃើញថា បានរំលោភលើសមត្ថកិច្ចរបស់គណៈកម្មការចម្រុះព្រំដែននៃភាគីទាំងពីរ (JBC) ផងដែរ។
ជាកិច្ចបញ្ចប់ ក្រសួងធម្មការ និងសាសនា បានអំពាវនាវឱ្យរាជរដ្ឋាភិបាលថៃ បញ្ឈប់រាល់សកម្មភាពបួងសួង ឬពិធីកម្មសាសនាផ្សេងៗនៅប្រាសាទតាក្របី និងតំបន់ជុំវិញនោះជាបន្ទាន់។ ជាមួយគ្នានេះ កម្ពុជាក៏បានបញ្ជាក់សារជាថ្មីនូវជំហរក្នុងការដោះស្រាយរាល់បញ្ហាដែលនៅសេសសល់ដោយសន្តិវិធី តាមរយៈយន្តការទ្វេភាគីដែលមានស្រាប់ ជាពិសេសគឺយន្តការ JBC ដើម្បីរក្សានូវស្ថិរភាព និងទំនាក់ទំនងរវាងប្រទេសជិតខាងទាំងពីរ៕
