**(ខេត្តកំពត)៖** ដើម្បីពង្រឹងសន្តិសុខ សណ្តាប់ធ្នាប់សាធារណៈ និងការអនុវត្តច្បាប់ស្តីពីអន្តោប្រវេសន៍នៃព្រះរាជាណាចក្រកម្ពុជាឱ្យមានប្រសិទ្ធភាពខ្ពស់ អាជ្ញាធរមានសមត្ថកិច្ចខេត្តកំពត បានចុះអនុវត្តវិធានការច្បាប់យ៉ាងតឹងរ៉ឹងចំពោះម្ចាស់ផ្ទះជួលមួយកន្លែង ស្ថិតក្នុងភូមិក្រាំង ឃុំត្រពាំងធំ ស្រុកទឹកឈូ បន្ទាប់ពីរកឃើញថាមានការល្មើសនឹងបទបញ្ញត្តិស្តីពីការស្នាក់នៅរបស់ជនបរទេស។
យោងតាមរបាយការណ៍ពីមន្ត្រីជំនាញនៃស្នងការដ្ឋាននគរបាលខេត្តកំពត បានឱ្យដឹងថា ម្ចាស់ផ្ទះជួលខាងលើត្រូវបានរកឃើញថា បានអនុញ្ញាតឱ្យជនបរទេសចំនួន ០៦ នាក់ ស្នាក់នៅដោយគ្មានលិខិតឆ្លងដែន និងគ្មានឯកសារស្នាក់នៅត្រឹមត្រូវតាមច្បាប់។ អនុលោមតាមច្បាប់ស្តីពីអន្តោប្រវេសន៍ និងបទដ្ឋានគតិយុត្តជាធរមាន អាជ្ញាធរបានសម្រេចដាក់ពិន័យជាប្រាក់ចំនួន ៤,០០០,០០០ (បួនលាន) រៀល ក្នុងម្នាក់ គិតជាសរុបសម្រាប់ជនបរទេសទាំង ០៦ នាក់ គឺមានចំនួន ២៤,០០០,០០០ (ម្ភៃបួនលាន) រៀល ដែលទឹកប្រាក់ពិន័យនេះគឺជាបន្ទុកទទួលខុសត្រូវទាំងស្រុងរបស់ម្ចាស់ផ្ទះជួល។
ក្នុងឱកាសនោះដែរ អាជ្ញាធរមានសមត្ថកិច្ចបានអំពាវនាវយ៉ាងទទូចដល់បងប្អូនប្រជាពលរដ្ឋ ជាពិសេសម្ចាស់ផ្ទះជួល សណ្ឋាគារ និងផ្ទះសំណាក់ទាំងអស់ សូមមេត្តាបង្កើនការប្រុងប្រយ័ត្នខ្ពស់ក្នុងការពិនិត្យឯកសារគតិយុត្ត និងលិខិតឆ្លងដែនឱ្យបានច្បាស់លាស់ មុននឹងសម្រេចទទួលជនបរទេសឱ្យស្នាក់នៅ។ វិធានការនេះ មិនត្រឹមតែជាការគោរពច្បាប់ប៉ុណ្ណោះទេ ប៉ុន្តែក៏ជាចំណែកមួយយ៉ាងសំខាន់ក្នុងការទប់ស្កាត់បទល្មើសឆ្លងដែនគ្រប់ប្រភេទ ជាពិសេសការលួចលាក់ធ្វើសកម្មភាពឆបោកតាមប្រព័ន្ធបច្ចេកវិទ្យា (Online Scam) ដែលអាចបង្កឱ្យមានផលប៉ះពាល់ដល់សន្តិសុខជាតិ និងសណ្តាប់ធ្នាប់សង្គម។
សូមបញ្ជាក់ថា រាជរដ្ឋាភិបាលកម្ពុជា តាមរយៈក្រសួងមហាផ្ទៃ តែងតែយកចិត្តទុកដាក់ខ្ពស់លើការគ្រប់គ្រងអន្តោប្រវេសន៍ ដើម្បីធានាបាននូវសុខសន្តិភាព និងការអភិវឌ្ឍស្របតាមគោលនយោបាយភូមិ-ឃុំ មានសុវត្ថិភាព។ ករណីដែលម្ចាស់ទីតាំងនៅតែបន្តធ្វេសប្រហែស ឬមានចេតនាផ្តល់ជម្រកដល់ជនបរទេសខុសច្បាប់ នឹងត្រូវប្រឈមមុខចំពោះមុខច្បាប់ជាធរមានដោយគ្មានការលើកលែងឡើយ។
សមត្ថកិច្ចជំនាញនឹងបន្តចុះពិនិត្យ និងតាមដានរាល់ការស្នាក់នៅរបស់ជនបរទេសតាមមូលដ្ឋាននានា ដើម្បីធានាឱ្យបាននូវការអនុវត្តច្បាប់ប្រកបដោយតម្លាភាព និងស័ក្តិសិទ្ធភាពខ្ពស់បំផុត។
