**(រាជធានីភ្នំពេញ)៖** យោងតាមស្មារតីនៃកិច្ចប្រជុំពង្រឹងសន្តិសុខ សណ្តាប់ធ្នាប់ និងសុវត្ថិភាពសង្គម នៅរសៀលថ្ងៃទី១៥ ខែមីនា ឆ្នាំ២០២៦ នេះ ក្រោមការអនុញ្ញាតដ៏ខ្ពង់ខ្ពស់ពី ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ស្នងការដ្ឋាននគរបាលរាជធានីភ្នំពេញ បានរៀបចំកិច្ចប្រជុំផ្សព្វផ្សាយផែនការសកម្មភាពស្តីពីការរឹតបន្តឹងការអនុវត្តច្បាប់ចរាចរណ៍ផ្លូវគោក ជាពិសេសការពិនិត្យជាតិស្រវឹងនាពេលរាត្រី ដែលនឹងត្រូវចាប់អនុវត្តពេញលេញក្នុងភូមិសាស្ត្ររាជធានីភ្នំពេញ ចាប់ពីថ្ងៃទី១៧ ខែមីនា ឆ្នាំ២០២៦ នេះតទៅ។
កិច្ចប្រជុំដ៏មានសារៈសំខាន់នេះ បានប្រព្រឹត្តទៅក្រោមអធិបតីភាព លោកឧត្តមសេនីយ៍ទោ ហេង រតនា ស្នងការរងផែនការងារនគរបាលចរាចរណ៍ និងលោកវរសេនីយ៍ឯក មួន សុខា ស្នងការរងទទួលដឹកនាំការិយាល័យនគរបាលចរាចរណ៍ផ្លូវគោក ដោយមានការអញ្ជើញចូលរួមពីមន្ត្រីនគរបាលជំនាញពាក់ព័ន្ធជាច្រើនរូប។
ក្នុងឱកាសនោះ លោកឧត្តមសេនីយ៍ទោ ហេង រតនា បានមានប្រសាសន៍សង្កត់ធ្ងន់ថា ការអនុវត្តវិធានការរឹតបន្តឹងច្បាប់ចរាចរណ៍តាមរយៈការពិនិត្យជាតិស្រវឹងនាពេលរាត្រីនេះ គឺជាកិច្ចការអាទិភាពក្នុងគោលដៅកាត់បន្ថយគ្រោះថ្នាក់ចរាចរណ៍ឱ្យមកនៅកម្រិតទាបបំផុត និងដើម្បីការពារអាយុជីវិត ទ្រព្យសម្បត្តិរបស់ប្រជាពលរដ្ឋ ស្របតាមអនុសាសន៍ដឹកនាំដ៏ខ្ពង់ខ្ពស់របស់ប្រមុខរាជរដ្ឋាភិបាល និងថ្នាក់ដឹកនាំក្រសួងមហាផ្ទៃ។ លោកបានបន្តថា រាល់កម្លាំងអនុវត្តច្បាប់ទាំងអស់ ត្រូវប្រកាន់ខ្ជាប់នូវក្រមសីលធម៌វិជ្ជាជីវៈ ភាពអត់ធ្មត់ និងប្រើប្រាស់ពាក្យសម្ដីសមរម្យជាមួយប្រជាពលរដ្ឋ ប៉ុន្តែត្រូវមានភាពម៉ឺងម៉ាត់ក្នុងការអនុវត្តច្បាប់ ចំពោះបុគ្គលដែលបំពានបទបញ្ជា។
ទន្ទឹមនឹងនេះ លោកវរសេនីយ៍ឯក មួន សុខា ក៏បានរំឭកដល់មន្ត្រីក្រោមឱវាទទាំងអស់ ត្រូវយកចិត្តទុកដាក់ត្រួតពិនិត្យឧបករណ៍បច្ចេកទេសឱ្យបានត្រឹមត្រូវ និងរៀបចំគោលដៅត្រួតពិនិត្យឱ្យមានសណ្តាប់ធ្នាប់ ជៀសវាងការបង្កឱ្យមានការកកស្ទះចរាចរណ៍ដល់អ្នកដំណើរផ្សេងទៀត។ លោកបានបញ្ជាក់បន្ថែមថា យុទ្ធនាការនេះនឹងត្រូវធ្វើឡើងជារៀងរាល់យប់ នៅតាមបណ្តាគោលដៅសំខាន់ៗទូទាំងខណ្ឌទាំង១៤ ក្នុងរាជធានីភ្នំពេញ។
ការរឹតបន្តឹងច្បាប់នេះ ធ្វើឡើងក្នុងស្មារតីគោរពតាម «ច្បាប់ស្តីពីចរាចរណ៍ផ្លូវគោក» និងដើម្បីធានាបាននូវសន្តិសុខសុវត្ថិភាពសង្គម ប្រកបដោយបរិយាបន្ន និងការអភិវឌ្ឍ។ ស្នងការដ្ឋាននគរបាលរាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋទាំងអស់ មេត្តាចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន និងសូមកុំបើកបរក្នុងស្ថានភាពស្រវឹង ដើម្បីជៀសវាងនូវគ្រោះថ្នាក់ជាយថាហេតុ ដែលនាំមកនូវការបាត់បង់សមាជិកគ្រួសារ និងខាតបង់សេដ្ឋកិច្ចជាតិ។
ជាកិច្ចបញ្ចប់នៃកិច្ចប្រជុំ ថ្នាក់ដឹកនាំអង្គប្រជុំបានសម្តែងនូវជំនឿយ៉ាងមុតមាំថា តាមរយៈការអនុវត្តវិធានការនេះ ស្ថានភាពចរាចរណ៍ក្នុងរាជធានីភ្នំពេញ នឹងកាន់តែមានភាពប្រសើរឡើង ស្របតាមទិសស្លោក «ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍»៕
