(KPDNEWS) – ភ្នំពេញ៖ ក្នុងយុទ្ធនាការទ្រង់ទ្រាយធំដើម្បីពង្រឹងសន្តិសុខផ្ទៃក្នុង និងកិច្ចសហប្រតិបត្តិការអន្តរជាតិ អាជ្ញាធរមានសមត្ថកិច្ចកម្ពុជាបានសម្រេចបណ្ដេញជនជាតិចិនចំនួន ៥០០នាក់ ចេញពីទឹកដីនៃព្រះរាជាណាចក្រកម្ពុជា កាលពីយប់ថ្ងៃទី១៥ ឈានចូលថ្ងៃទី១៦ ខែមីនា ឆ្នាំ២០២៦ តាមរយៈជើងហោះហើរពិសេស។ ការវិធានការនេះត្រូវបានធ្វើឡើងបន្ទាប់ពីរកឃើញថា បុគ្គលទាំងនោះបានជាប់ពាក់ព័ន្ធនឹងករណីឆបោកតាមប្រព័ន្ធអនឡាញ (Online Scams) ការស្នាក់នៅ និងធ្វើការខុសច្បាប់ ដែលជាការរំលោភបំពានយ៉ាងធ្ងន់ធ្ងរលើច្បាប់អន្តោប្រវេសន៍នៃកម្ពុជា។
ការអនុវត្តវិធានការច្បាប់ដ៏តឹងរ៉ឹងនេះ ធ្វើឡើងស្របតាមអនុសាសន៍ដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការបញ្ជាផ្ទាល់ពី ឯកឧត្តម ឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍។ នាយកដ្ឋានស៊ើបអង្កេត និងអនុវត្តនីតិវិធី បានសហការយ៉ាងជិតស្និទ្ធជាមួយស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា ដើម្បីបញ្ជូនជនសង្ស័យទាំង ៥០០នាក់ (ក្នុងនោះមានស្ត្រី ១៣នាក់) ត្រឡប់ទៅប្រទេសដើមវិញតាមរយៈប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ និងអាកាសយានដ្ឋានអន្តរជាតិកងកេង ខេត្តព្រះសីហនុ។
យោងតាមរបាយការណ៍ពីអគ្គនាយកដ្ឋានអន្តោប្រវេសន៍ ការបណ្ដេញចេញនេះមិនត្រឹមតែជាការអនុវត្តច្បាប់ចំពោះបុគ្គលដែលប្រព្រឹត្តបទល្មើសប៉ុណ្ណោះទេ ប៉ុន្តែវាក៏ជាយុទ្ធសាស្ត្ររួមក្នុងការបោសសម្អាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យាដែលកំពុងរីករាលដាលជាសកល។ រាជរដ្ឋាភិបាលកម្ពុជាបានបង្ហាញជំហរយ៉ាងច្បាស់ថា គ្មានការលើកលែងណាមួយឡើយចំពោះមេខ្លោងដែលនៅពីក្រោយខ្នងនៃសកម្មភាពខុសច្បាប់ទាំងនេះ ខណៈដែលកម្ពុជាក៏បានដើរតួយ៉ាងសំខាន់ក្នុងការជួយសង្គ្រោះជនរងគ្រោះដែលត្រូវបានបោកបញ្ឆោតឱ្យមកធ្វើការក្នុងសង្វាក់ផលិតកម្មឆបោក ដើម្បីឱ្យពួកគេមានសេរីភាព និងអាចវិលត្រឡប់ទៅជួបជុំគ្រួសារវិញ។
អ្នកវិភាគសន្តិសុខបានមើលឃើញថា សកម្មភាពនេះឆ្លុះបញ្ចាំងពីការប្ដេជ្ញាចិត្តខ្ពស់របស់កម្ពុជា ក្នុងការការពារសុវត្ថិភាព និងផលប្រយោជន៍ជូនប្រជាពលរដ្ឋទាំងក្នុងតំបន់ និងសកលលោក។ តាមរយៈកិច្ចសហការទ្វេភាគីជាមួយភាគីចិន កម្ពុជាបានបង្ហាញពិភពលោកថា ខ្លួនមិនមែនជាជម្រកសម្រាប់ក្រុមឧក្រិដ្ឋជនបច្ចេកវិទ្យានោះទេ ហើយវិធានការ “ក្ដៅ” នឹងបន្តអនុវត្តជាបន្តបន្ទាប់ដើម្បីរក្សាសណ្ដាប់ធ្នាប់សង្គម និងកិត្តិយសជាតិនៅលើឆាកអន្តរជាតិ។
ជាចុងក្រោយ ការបណ្ដេញចេញនេះគឺជាសារព្រមានយ៉ាងខ្លាំងក្លាទៅកាន់ក្រុមឧក្រិដ្ឋជនឆ្លងដែនដទៃទៀតថា រាល់សកម្មភាពល្មើសច្បាប់នៅលើទឹកដីកម្ពុជា នឹងត្រូវប្រឈមមុខនឹងចំណាត់ការច្បាប់ដោយគ្មានការយោគយល់ បូករួមទាំងការដាក់បញ្ចូលក្នុង “បញ្ជីខ្មៅ” (Blacklist) មិនឱ្យចូលប្រទេសកម្ពុជាជាស្ថាពរ៕




















