[ខេត្តព្រៃវែង, ថ្ងៃទី២៦ ខែសីហា ឆ្នាំ២០២៦ | ម៉ោង ១០:៣៦ នាទីព្រឹក] –
ទីតាំងអតីតស្រះទឹកដ៏ធំមួយ ដែលស្ថិតនៅជាប់នឹងរបងស្នងការដ្ឋាននគរបាលខេត្តព្រៃវែង ដែលធ្លាប់តែជាទីតាំងស្តុកទុកនូវភក់ជ្រាំ ទឹកកខ្វក់ និងកាកសំណល់បង្គន់អនាម័យអស់រយៈពេលរាប់សិបឆ្នាំមកនោះ នៅពេលនេះត្រូវបានកែប្រែមុខមាត់ថ្មីទាំងស្រុង តាមរយៈការអភិវឌ្ឍប្រកបដោយចក្ខុវិស័យវែងឆ្ងាយ ឱ្យក្លាយទៅជាទីតាំងបំពេញការងារដ៏សមរម្យ និងមានបរិស្ថានស្អាតបាតគួរជាទីមោទនៈ។
យោងតាមប្រភពព័ត៌មានពីអាជ្ញាធរមូលដ្ឋាន និងការរៀបរាប់របស់ប្រជាពលរដ្ឋបានឱ្យដឹងថា កាលពីអតីតកាល ទីតាំងនេះគឺជាតំបន់ទីទំនាបដែលទទួលរងនូវការជន់លិចទាំងរដូវប្រាំង និងរដូវវស្សា។ ដោយសារកង្វះប្រព័ន្ធលូបង្ហូរទឹកកខ្វក់ជាលក្ខណៈបច្ចេកទេស កន្លងមក បងប្អូនប្រជាពលរដ្ឋដែលមានលំនៅឋានក្បែរនោះ ជាពិសេសអ្នកប្រកបមុខរបរលក់ដូរគ្រឿងហូបចុក បានបង្ហូរទឹកសម្អុយ និងកាកសំណល់ផ្សេងៗចូលទៅក្នុងស្រះនេះ ដែលបណ្តាលឱ្យមានក្លិនអសោច និងប៉ះពាល់យ៉ាងខ្លាំងដល់សុខភាពសាធារណៈ ក៏ដូចជាសោភ័ណភាពនៃអង្គភាពស្នងការដ្ឋាន។
ក្រោមការដឹកនាំ និងការយកចិត្តទុកដាក់ខ្ពស់ពីសំណាក់ថ្នាក់ដឹកនាំរដ្ឋបាលខេត្ត និងថ្នាក់ដឹកនាំស្នងការដ្ឋាននគរបាលខេត្តព្រៃវែង បញ្ហាប្រឈមដែលអូសបន្លាយអស់រាប់សិបឆ្នាំនេះ ត្រូវបានដោះស្រាយជាដំណាក់កាល។ ការរៀបចំកែលម្អប្រព័ន្ធបង្ហូរទឹក ការចាក់ដីបំពេញ និងការសាងសង់ហេដ្ឋារចនាសម្ព័ន្ធថ្មី បានប្រែក្លាយតំបន់ដែលធ្លាប់តែជាភក់ជ្រាំ ឱ្យក្លាយជាទីតាំងដែលមានសណ្ដាប់ធ្នាប់ និងជាកន្លែងធ្វើការដ៏មានផាសុកភាពសម្រាប់មន្ត្រីរាជការ ក៏ដូចជាផ្តល់ភាពងាយស្រួលដល់ប្រជាពលរដ្ឋដែលមកទទួលសេវាសាធារណៈ។
សមិទ្ធផលនេះ មិនត្រឹមតែបង្ហាញពីការរីកចម្រើនផ្នែកហេដ្ឋារចនាសម្ព័ន្ធប៉ុណ្ណោះទេ ប៉ុន្តែវាក៏ជាការលើកកម្ពស់អនាម័យបរិស្ថាន និងការរស់នៅរបស់បងប្អូនប្រជាពលរដ្ឋជុំវិញតំបន់នោះផងដែរ។ បច្ចុប្បន្ន ភាពកខ្វក់ និងក្លិនស្អុយដែលធ្លាប់តែជាកង្វល់ត្រូវបានលុបបំបាត់ និងជំនួសមកវិញនូវបរិយាកាសស្រស់បំព្រង ដែលស័ក្តិសមជាមុខមាត់ថ្មីសម្រាប់រដ្ឋបាលខេត្តព្រៃវែងទាំងមូល៕
រក្សាសិទ្ធិដោយ៖ KPDNEWS
