**(រាជធានីភ្នំពេញ)៖** យោងតាមប្រកាសផ្លូវការរបស់ក្រសួងមហាផ្ទៃ ចុះថ្ងៃទី១០ ខែមីនា ឆ្នាំ២០២៦ ស្ថាប័នកំពូលនៃសន្តិសុខជាតិ បានសម្រេចផ្អាកមុខងារមន្ត្រីពន្ធនាគារជាន់ខ្ពស់នៃពន្ធនាគារខេត្តស្ទឹងត្រែង ចំនួន ៤រូប ជាបណ្តោះអាសន្ន។ វិធានការវិន័យនេះត្រូវបានអនុវត្តឡើង បន្ទាប់ពីមានការធ្លាយចេញនូវព័ត៌មានជុំវិញភាពមិនប្រក្រតី និងការកំណត់យកកម្រៃខុសច្បាប់ពីជនជាប់ឃុំ ដែលបានចែកចាយនៅលើបណ្តាញសង្គមនាពេលថ្មីៗនេះ។
យោងតាមខ្លឹមសារនៃប្រកាសខាងលើ ក្នុងប្រការ ១ បានបញ្ជាក់ថា មន្ត្រីពន្ធនាគារទាំង ៤រូប ត្រូវបានផ្អាកមុខងារ និងតម្រូវឱ្យមកបម្រើការងារនៅនាយកដ្ឋានរដ្ឋបាលសរុប ចំណុះអគ្គនាយកដ្ឋានពន្ធនាគារ ដើម្បីរង់ចាំការពិនិត្យ និងដោះស្រាយតាមនីតិវិធីរដ្ឋបាល។ សមាសភាពមន្ត្រីដែលរងការផ្អាកមុខងារ រួមមាន៖
១- លោកឧត្តមអគ្គានុរក្សថ្នាក់លេខ២ លឹម វាសនា អត្តលេខ ២៦៨៧ ប្រធានពន្ធនាគារខេត្តស្ទឹងត្រែង។
២- លោកវរអគ្គានុរក្សថ្នាក់លេខ២ ផាន់ រចនា អត្តលេខ ១៧៧៩ ប្រធានការិយាល័យប្រតិបត្តិ។
៣- លោកអគ្គានុរក្សថ្នាក់លេខ១ ងួន រតនៈ អត្តលេខ ២៣៩០ អនុប្រធានការិយាល័យប្រតិបត្តិ។
៤- លោកអគ្គានុរក្សថ្នាក់លេខ១ ពុម្ព រតនៈ អត្តលេខ ២៥៧៨ ប្រធានផ្នែកគ្រប់គ្រងជនជាប់ឃុំ។
ក្នុងប្រការ ២ នៃប្រកាសដដែលនេះ បានបញ្ជាក់យ៉ាងច្បាស់ថា បទប្បញ្ញត្តិទាំងឡាយណាដែលមានខ្លឹមសារផ្ទុយនឹងប្រកាសនេះ ត្រូវទុកជានិរាករណ៍។ ចំណែកឯប្រការ ៣ បានបង្គាប់ឱ្យអគ្គលេខាធិការដ្ឋាន អគ្គនាយកដ្ឋានធនធានមនុស្ស អគ្គនាយកដ្ឋានភស្តុភារនិងហិរញ្ញវត្ថុ អគ្គនាយកដ្ឋានពន្ធនាគារ រួមទាំងក្រុមប្រឹក្សា និងគណៈអភិបាលខេត្តស្ទឹងត្រែង ត្រូវអនុវត្តប្រកាសនេះឱ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខានេះតទៅ។
វិធានការដ៏ម៉ឺងម៉ាត់របស់ក្រសួងមហាផ្ទៃនាពេលនេះ ឆ្លុះបញ្ចាំងឱ្យឃើញពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាល ក្នុងការអនុវត្តអភិបាលកិច្ចល្អ និងការពង្រឹងវិន័យមន្ត្រីរាជការ ជាពិសេសមន្ត្រីអនុវត្តច្បាប់ ដើម្បីធានាបាននូវតម្លាភាព យុត្តិធម៌ និងសេចក្តីថ្លៃថ្នូរក្នុងប្រព័ន្ធពន្ធនាគារ។ ករណីនេះ ក៏ជាសារដាស់តឿនដល់មន្ត្រីគ្រប់ជាន់ថ្នាក់ ឱ្យប្រកាន់ខ្ជាប់នូវក្រមសីលធម៌វិជ្ជាជីវៈ និងជៀសវាងរាល់សកម្មភាពទាំងឡាយណាដែលប៉ះពាល់ដល់ប្រយោជន៍សាធារណៈ និងកិត្តិយសរបស់ស្ថាប័នជាតិ។
គួរបញ្ជាក់ផងដែរថា ប្រកាសនេះត្រូវបានធ្វើឡើងនៅរាជធានីភ្នំពេញ នាថ្ងៃអង្គារ ៧រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១១ ខែមីនា ឆ្នាំ២០២៦ ក្រោមហត្ថលេខា និងត្រាផ្លូវការរបស់ថ្នាក់ដឹកនាំក្រសួងមហាផ្ទៃ៕
**KPDNEWS – រក្សាសិទ្ធិគ្រប់យ៉ាងដោយអ្នកយកព័ត៌មាន**



















