ប្រធានាធិបតីអ៊ីរ៉ង់បញ្ជាក់ក្នុងលិខិតថា អ៊ីរ៉ង់គ្មានគំនុំសត្រូវជាមួយប្រជាជនអាមេរិកទូទៅឡើយ

ទីក្រុងតេអេរ៉ង់៖ លោក Masoud Pezeshkian ប្រធានាធិបតីអ៊ីរ៉ង់ បានផ្ញើសារជាលិខិតចំហមួយផ្ញើជូនប្រជាជនអាមេរិក ដោយក្នុងនោះលោកបានបញ្ជាក់យ៉ាងច្បាស់ថា ប្រទេសអ៊ីរ៉ង់មិនមានគំនិតព្យាបាទ ឬចាត់ទុកប្រជាជនអាមេរិកទូទៅជាសត្រូវនោះទេ។

យោងតាមការចុះផ្សាយរបស់សារព័ត៌មាន Press TV កាលពីថ្ងៃពុធ លោកប្រធានាធិបតីបានលើកឡើងក្នុងលិខិតនោះថា ការព្យាយាមលាបពណ៌ ឬបង្ហាញរូបភាពនៃប្រទេសអ៊ីរ៉ង់ថាជាការគំរាមកំហែង គឺជាទង្វើដែលមិនស្របទៅនឹងតថភាពប្រវត្តិសាស្ត្រ ក៏ដូចជាអង្គហេតុជាក់ស្តែងដែលកំពុងកើតមាននាពេលបច្ចុប្បន្នឡើយ។

ការថ្លែងរបស់លោក Pezeshkian ធ្វើឡើងក្នុងគោលបំណងកាត់បន្ថយភាពតានតឹង និងការយល់ច្រឡំរវាងប្រជាជាតិទាំងពីរ ដោយលោកបានសង្កត់ធ្ងន់ថា ការចោទប្រកាន់នានាមកលើអ៊ីរ៉ង់នាពេលកន្លងមក គឺមិនមានមូលដ្ឋានច្បាស់លាស់ដែលឆ្លុះបញ្ចាំងពីការពិតនៃគោលនយោបាយរបស់ទីក្រុងតេអេរ៉ង់ចំពោះសាធារណជនអាមេរិកនោះទេ។