**(ទីក្រុងហ្សេរុយសាឡឹម)៖** កងកម្លាំងការពារជាតិអ៊ីស្រាអែល (IDF) បានបញ្ជាក់អំពីលទ្ធផលនៃប្រតិបត្តិការយោធាក្នុងរយៈពេលពីរថ្ងៃចុងក្រោយនេះ ដោយបានធ្វើការវាយប្រហារលើទីតាំងយុទ្ធសាស្ត្រ និងដកហូតបាននូវសម្ភារសឹកជាច្រើនរបស់ក្រុមសកម្មប្រយុទ្ធហេសបូឡាហ៍ (Hezbollah) នៅក្នុងតំបន់ការពារជួរមុខ។
យោងតាមសេចក្តីថ្លែងការណ៍ផ្លូវការរបស់កងកម្លាំង IDF បានឱ្យដឹងថា កាលពីពីរថ្ងៃមុន ក្នុងអំឡុងពេលបំពេញបេសកកម្មប្រតិបត្តិការក្នុងតំបន់ការពារជួរមុខ កងទ័ពអាកាសអ៊ីស្រាអែលបានកំណត់គោលដៅ និងវាយប្រហារចំសំណង់អគារមួយកន្លែង ដែលត្រូវបានគេកំណត់អត្តសញ្ញាណថាជាទីតាំងបង្កប់ខ្លួនរបស់ក្រុមភេរវករហេសបូឡាហ៍។
ដោយឡែក កាលពីថ្ងៃអាទិត្យម្សិលមិញនេះ កងកម្លាំងថ្មើរជើងបានបន្តធ្វើការរុករកយ៉ាងហ្មត់ចត់នៅក្នុងតំបន់ដដែល ហើយបានរកឃើញឃ្លាំងផ្ទុកអាវុធដ៏ធំមួយ។ ក្នុងប្រតិបត្តិការនោះ កងកម្លាំងបានរឹបអូសបាននូវគ្រាប់រ៉ុក្កែតរាប់សិបគ្រាប់ ឧបករណ៍បំផ្ទុះ ក៏ដូចជាអាវុធវែងខ្លីជាច្រើនប្រភេទ ដែលត្រូវបានរៀបចំទុកសម្រាប់ធ្វើសកម្មភាពបង្កអសន្តិសុខ។
បន្ថែមពីលើនេះ កងកម្លាំង IDF ក៏បានវាយប្រហារលើខ្មាន់កាំភ្លើងពីររូបរបស់ក្រុមហេសបូឡាហ៍ ដែលមានបំណងចូលមកកៀកនឹងតំបន់ឈរជើងរបស់កងទ័ពអ៊ីស្រាអែលក្នុងលក្ខណៈគំរាមកំហែងផងដែរ។
តំណាងកងកម្លាំងការពារជាតិអ៊ីស្រាអែល បានគូសបញ្ជាក់ថា IDF នឹងបន្តប្រតិបត្តិការប្រកបដោយការប្តេជ្ញាចិត្តខ្ពស់បំផុត ប្រឆាំងនឹងអង្គការភេរវករហេសបូឡាហ៍ ដែលបានសម្រេចចិត្តវាយប្រហារលើរដ្ឋអ៊ីស្រាអែល ក្រោមការជ្រោមជ្រែងពីរបបដឹកនាំអ៊ីរ៉ង់។ ជាមួយគ្នានេះ អ៊ីស្រាអែលបានអះអាងសារជាថ្មីថា ខ្លួននឹងមិនអត់ឱនចំពោះរាល់ការប៉ុនប៉ងបង្កគ្រោះថ្នាក់ ឬការធ្វើទុក្ខបុកម្នេញណាមួយ ដល់សុវត្ថិភាពរបស់ប្រជាពលរដ្ឋនៃរដ្ឋអ៊ីស្រាអែលឡើយ។
គួរបញ្ជាក់ថា ប្រតិបត្តិការនេះត្រូវបានធ្វើឡើងក្នុងក្របខណ្ឌនៃកិច្ចការពារបូរណភាពទឹកដី និងសន្តិសុខជាតិ ដោយអនុលោមតាមបទដ្ឋានសន្តិសុខ ដើម្បីធានាឱ្យបាននូវសន្តិភាពជូនប្រជាពលរដ្ឋក្នុងតំបន់៕
**ការិយាល័យព័ត៌មាន KPDNEWS**
