(ខេត្តឧត្តរមានជ័យ)៖ នៅព្រឹកថ្ងៃទី២៣ ខែឧសភា ឆ្នាំ២០២៦ វេលាម៉ោង ៩:៥០នាទី ក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលជូនក្រុមអ្នកសង្កេតការណ៍អាស៊ាន (AOT) ដែលដឹកនាំដោយប្រធានបេសកកម្មមកពីសាធារណរដ្ឋហ្វីលីពីន (AOT HOM) ដើម្បីចុះបំពេញបេសកកម្មសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពជាក់ស្តែងនៅតាមបណ្តោយព្រំដែន ក្នុងតំបន់ច្រកទ្វារអន្តរជាតិអូរស្មាច់ ក្រុងសំរោង ខេត្តឧត្តរមានជ័យ។ ការចុះបំពេញទស្សនកិច្ចនេះ ធ្វើឡើងក្នុងគោលបំណងពិនិត្យលើការអនុវត្តវិធានការនានា ស្របតាមស្មារតីនៃសេចក្តីប្រកាសរួម ក្រោយបទឈប់បាញ់បានចូលជាធរមាន ដើម្បីធានាបាននូវសន្តិភាពប្រកបដោយចីរភាព។
ក្នុងបេសកកម្មដ៏មានសារៈសំខាន់នេះ ក្រុមអ្នកសង្កេតការណ៍អាស៊ាន បានយកចិត្តទុកដាក់ខ្ពស់លើការពិនិត្យស្ថានភាពសន្តិសុខ ការចល័តទ័ព និងការរស់នៅរបស់ប្រជាពលរដ្ឋក្នុងតំបន់។ ការចុះផ្ទៀងផ្ទាត់ផ្ទាល់នេះ គឺជាផ្នែកមួយនៃយន្តការតំបន់ ដើម្បីធានាថារាល់ភាគីពាក់ព័ន្ធទាំងអស់បានគោរពតាមគោលការណ៍ដែលបានព្រមព្រៀងគ្នា ចៀសវាងការយល់ច្រឡំជាយថាហេតុ និងដើម្បីពង្រឹងជំនឿទុកចិត្តរវាងប្រទេសជិតខាង។
ពាក់ព័ន្ធនឹងបញ្ហានេះ រាជរដ្ឋាភិបាលកម្ពុជា តាមរយៈក្រសួងការពារជាតិ បានបញ្ជាក់ជាថ្មីនូវជំហរដាច់ខាត និងការប្តេជ្ញាចិត្តយ៉ាងម៉ឺងម៉ាត់ ប្រកបដោយភាពស្មោះត្រង់ និងសុចរិតភាព ក្នុងការគោរព និងអនុវត្តឱ្យបានខ្ជាប់ខ្ជួនបំផុតនូវរាល់ខ្លឹមសារនៃសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៧ ខែធ្នូ ឆ្នាំ២០២៥។ ទន្ទឹមនឹងនេះ កម្ពុជានៅតែបន្តរក្សាជំហររឹងមាំក្នុងការអនុវត្តសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព រវាងកម្ពុជានិងថៃ ចុះថ្ងៃទី២៦ ខែតុលា ឆ្នាំ២០២៥ ក៏ដូចជាកិច្ចព្រមព្រៀងពាក់ព័ន្ធដទៃទៀត ដែលបានចុះហត្ថលេខារួចមកហើយ។
មន្ត្រីជាន់ខ្ពស់នៃក្រុមអ្នកសម្របសម្រួលកម្ពុជា បានលើកឡើងថា ការអនុញ្ញាតឱ្យមានវត្តមានក្រុមអ្នកសង្កេតការណ៍អន្តរជាតិនៅពេលនេះ គឺជាសក្ខីភាពបង្ហាញពីតម្លាភាព និងឆន្ទៈមោះមុតរបស់កម្ពុជា ក្នុងការដោះស្រាយបញ្ហាដោយសន្តិវិធី និងតាមផ្លូវច្បាប់។ គោលដៅចម្បងនៃកិច្ចខិតខំប្រឹងប្រែងនេះ គឺដើម្បីឆ្ពោះទៅរកការធ្វើឱ្យប្រសើរឡើងវិញនូវទំនាក់ទំនងទ្វេភាគី ការវិលត្រឡប់ទៅរកស្ថានភាពប្រក្រតីភាព សន្តិភាព ស្ថិរភាព និងសុវត្ថិភាពពេញលេញ ជូនប្រជាពលរដ្ឋដែលរស់នៅតាមបណ្តោយព្រំដែននៃប្រទេសទាំងពីរ។
ជាទីបញ្ជាក់ផងដែរថា ស្ថានភាពនៅតំបន់ច្រកអូរស្មាច់នាពេលនេះ មានភាពស្ងប់ស្ងាត់ និងស្ថិតក្រោមការគ្រប់គ្រងយ៉ាងល្អប្រសើរ ខណៈដែលក្រុមអ្នកសង្កេតការណ៍អាស៊ាននឹងបន្តប្រមូលទិន្នន័យ ដើម្បីរៀបចំជារបាយការណ៍ផ្លូវការដាក់ជូនថ្នាក់ដឹកនាំអាស៊ានពិនិត្យ និងសម្រេចនាពេលឆាប់ៗខាងមុខ។ ការវិវត្តជាវិជ្ជមាននេះ ត្រូវបានគេរំពឹងថា នឹងក្លាយជាគំរូដ៏ល្អនៃការដោះស្រាយជម្លោះតាមរយៈយន្តការសន្តិវិធីនៅក្នុងតំបន់អាស៊ីអាគ្នេយ៍៕
