(កំពង់ឆ្នាំង)៖ យ៉ាងហោចណាស់មានមនុស្សចំនួន ៩ នាក់បានបាត់បង់ជីវិតភ្លាមៗ និង ៥៥ នាក់ផ្សេងទៀតបានរងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍ដ៏រន្ធត់មួយដែលបានកើតឡើងរវាងរថយន្តចំនួន ៤ គ្រឿង បុកបន្តកន្ទុយគ្នា កាលពីវេលាម៉ោង ០៦:១០ នាទីព្រឹក ថ្ងៃទី ២៣ ខែឧសភា ឆ្នាំ២០២៦។ ហេតុការណ៍នេះបានកើតឡើងនៅត្រង់ចំណុចមុខសាលាបឋមសិក្សាសាលាលេខ ៥ លើកំណាត់ផ្លូវជាតិលេខ ៥ (គន្លងផ្លូវខាងកើត) ចន្លោះគីឡូម៉ែត្រលេខ ៥២-៥៣ ស្ថិតក្នុងភូមិសាលាលេខ ៥ ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។
យោងតាមរបាយការណ៍បឋមពីមជ្ឈមណ្ឌលប្រចាំបញ្ជា ១១៧ នៃអគ្គស្នងការដ្ឋាននគរបាលជាតិ បានឱ្យដឹងថា ក្នុងចំណោមជនរងគ្រោះដែលបានស្លាប់ទាំង ៩ នាក់នោះ មានស្រីចំនួន ៨ នាក់ ចំណែកឯអ្នករងរបួសសរុប ៥៥ នាក់ (ស្រី ៥១ នាក់) ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗ ក្រោយកម្លាំងសមត្ថកិច្ចទទួលបានព័ត៌មានតាមរយៈប្រព័ន្ធ Hotline ១១៧ ពីប្រជាពលរដ្ឋដែលស្ថិតនៅកន្លែងកើតហេតុ។
ប្រតិបត្តិការសង្គ្រោះ និងអន្តរាគមន៍នេះត្រូវបានធ្វើឡើងយ៉ាងឆាប់រហ័ស ក្រោមការសម្របសម្រួលពីលោកវរសេនីយ៍ទោ ឌុច សាវឿន មន្ត្រីប្រចាំបញ្ជា ១១៧ ដែលបានបញ្ជូនព័ត៌មានបន្តទៅកាន់លោកវរសេនីយ៍ទោ អ៊ុំ ចំរើន នាយរងការិយាល័យនៃស្នងការដ្ឋាននគរបាលខេត្តកំពង់ឆ្នាំង ដើម្បីដឹកនាំកម្លាំងជំនាញចុះទៅដល់ទីតាំងផ្ទាល់។
តាមការសន្និដ្ឋានបឋមរបស់មន្ត្រីជំនាញចរាចរណ៍ មូលហេតុដែលបង្កឱ្យមានគ្រោះថ្នាក់ដ៏ធ្ងន់ធ្ងរនេះ គឺបណ្ដាលមកពីអ្នកបើកបររថយន្តបង្ក បើកបរក្នុងល្បឿនលឿន ខ្វះការប្រុងប្រយ័ត្ន និងការឈប់លើគន្លងផ្លូវវ៉ាជែង ដែលជាការរំលោភលើច្បាប់ចរាចរណ៍ផ្លូវគោកយ៉ាងធ្ងន់ធ្ងរ។ ក្រោយពេលកើតហេតុ អ្នកបើកបររថយន្តបង្កបានរត់គេចខ្លួនបាត់ស្រមោល ដែលបច្ចុប្បន្នសមត្ថកិច្ចកំពុងធ្វើការស្រាវជ្រាវតាមចាប់ខ្លួនមកផ្ដន្ទាទោសតាមច្បាប់។
ពាក់ព័ន្ធនឹងការដោះស្រាយនីតិវិធី កម្លាំងជំនាញនៃអធិការដ្ឋាននគរបាលស្រុកកំពង់ត្រឡាច សហការជាមួយប៉ុស្តិ៍នគរបាលរដ្ឋបាល បានចុះវាស់វែង និងធ្វើកំណត់ហេតុដកហូតវត្ថុតាងរថយន្តទាំង ៤ គ្រឿង យកទៅរក្សាទុកនៅស្នងការដ្ឋាននគរបាលខេត្តកំពង់ឆ្នាំង។ ចំពោះសពជនរងគ្រោះ សមត្ថកិច្ចបានធ្វើកំណត់ហេតុប្រគល់ជូនក្រុមគ្រួសារ និងសាច់ញាតិ ដើម្បីយកទៅធ្វើបុណ្យតាមប្រពៃណីទាំងក្ដីសង្វេគបំផុត។
