(ភ្នំពេញ)៖ ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចអគ្គមហាសេនាបតីតេជោ ហ៊ុន សែន នៅថ្ងៃនេះ បានបញ្ចេញសារនយោបាយដ៏មានអត្ថន័យជ្រាលជ្រៅ និងម៉ឺងម៉ាត់បំផុត តាមរយៈបណ្តាញសង្គមផ្លូវការ ដោយបានលើកឡើងនូវទស្សនៈប្រៀបធៀបថា «របួសកូនដៃមួយ មិនគួរធ្វើឱ្យខ្លួនប្រាណពិការទាំងមូលនោះឡើយ»។ ការថ្លែងបែបនេះ គឺជាការឆ្លើយតបទៅនឹងមជ្ឈដ្ឋានជ្រុលនិយមមួយចំនួន ដែលបានរិះគន់រាជរដ្ឋាភិបាលជុំវិញការរៀបចំពិធីបុណ្យចូលឆ្នាំថ្មី និងព្រឹត្តិការណ៍សង្ក្រាន្ត ខណៈដែលកម្ពុជាកំពុងប្រឈមនឹងបញ្ហាមួយចំនួននៅតាមព្រំដែន។
នៅក្នុងខ្លឹមសារនៃសារលិខិតនោះ សម្តេចតេជោ បានលើកឡើងជាសំណួរដាស់តឿនថា តើយើងអាចហាមឃាត់ទេវតាមិនឱ្យចុះមកបានទេ? តើអាចហាមប្រជាជនមិនឱ្យចូលឆ្នាំបានទេ? សម្តេចបានគូសបញ្ជាក់ថា ស្ថានភាពកម្ពុជានាពេលបច្ចុប្បន្ន គឺមានភាពខុសប្លែកគ្នាទាំងស្រុងពីឆ្នាំ២០២០ ដែលជាដំណាក់កាលរីករាលដាលខ្លាំងនៃជំងឺកូវីដ-១៩។ ការអនុញ្ញាតឱ្យប្រជាពលរដ្ឋប្រារព្ធពិធីបុណ្យជាតិ គឺជាសិទ្ធិសេរីភាព និងជាសុភមង្គលដែលមិនអាចខ្វះបានសម្រាប់សង្គមជាតិទាំងមូល។
សម្តេចតេជោ ហ៊ុន សែន ក៏បានទទួលស្គាល់នូវការលំបាក និងការលះបង់ដ៏ខ្ពង់ខ្ពស់របស់កងកម្លាំងប្រដាប់អាវុធនៅតាមព្រំដែនកម្ពុជា-ថៃ រួមទាំងបញ្ហាប្រជាជនភៀសសឹកមួយចំនួនដែលរងផលប៉ះពាល់។ ទោះជាយ៉ាងណាក៏ដោយ រាជរដ្ឋាភិបាលមិនបានបោះបង់ពួកគេចោលឡើយ ដោយបានជួយជ្រោមជ្រែងឱ្យពួកគាត់មានឱកាសបានចូលឆ្នាំដូចពលរដ្ឋដទៃទៀតដែរ។ សម្តេចបានសង្កត់ធ្ងន់ថា បញ្ហានៅចំណុចមួយនៃព្រំដែន មិនមែនជាមូលហេតុដែលត្រូវបង្ខំឱ្យប្រជាពលរដ្ឋជាង ១៧លាននាក់ផ្សេងទៀត បញ្ឈប់សកម្មភាពសេដ្ឋកិច្ច សង្គម និងការកម្សាន្តសប្បាយនោះទេ។
តាមរយៈវិភាគសេដ្ឋកិច្ច និងសង្គមវិជ្ជា សម្តេចតេជោបានពន្យល់ថា ប្រសិនបើកម្ពុជាផ្អាកការចូលឆ្នាំ នោះមានន័យថាត្រូវបិទផ្សារ បិទការលក់ដូរ បិទធនាគារ បិទរោងចក្រ បិទកសិដ្ឋាន និងបិទសាលារៀន ដែលសកម្មភាពទាំងនេះនឹងធ្វើឱ្យជាតិទាំងមូលធ្លាក់ចូលក្នុងស្ថានភាពពិការភាពផ្នែកសេដ្ឋកិច្ច។ ហេតុនេះ ការរៀបចំនគរសង្ក្រាន្ត និងការបង្កលក្ខណៈសប្បាយរីករាយជូនប្រជាពលរដ្ឋ គឺជាយុទ្ធសាស្ត្រថែរក្សានិរន្តរភាពជាតិ និងជាការតបតយ៉ាងចាស់ដៃទៅនឹងក្រុមប្រឆាំងដែលព្យាយាមបង្កភាពវិកវរ។
ជាចុងក្រោយ សម្តេចតេជោ ក៏បានផ្ញើសារអញ្ជើញដោយស្មោះសរដល់អ្នកដែលមាននិន្នាការផ្ទុយ ទាំងក្នុងនិងក្រៅប្រទេស ឱ្យចូលរួមសប្បាយរីករាយក្នុងពិធីបុណ្យចូលឆ្នាំថ្មីនេះផងដែរ។ សម្តេចបានដាស់តឿនថា «សូមកុំខ្មាស់អៀនអី» ហើយការប្រឆាំងនឹងភាពសប្បាយរីករាយរបស់រាស្ត្រ គឺជាការគិតខុសដែលនាំមកនូវការខាតបង់ចំពោះខ្លួនឯងប៉ុណ្ណោះ។
