ក្រសួងអប់រំប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡងឆ្នាំ២០២៦ ដោយមានអត្រាបេក្ខជនជាប់រហូតដល់ ៨៤.០៦%

រាជធានីភ្នំពេញ៖ក្រសួងអប់រំ យុវជន និងកីឡា បានចេញសេចក្តីប្រកាសព័ត៌មានជាផ្លូវការស្តីពីលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់សម័យប្រឡងថ្ងៃទី១០ ខែសីហា ឆ្នាំ២០២៦ ដោយបង្ហាញថាមានបេក្ខជនប្រឡងជាប់សរុបជាង ១២ម៉ឺននាក់។

យោងតាមសេចក្តីប្រកាសព័ត៌មានលេខ ១៩ អយក.សប្រព ចុះថ្ងៃទី១ ខែកញ្ញា ឆ្នាំ២០២៦ ក្រសួងអប់រំបានបញ្ជាក់ថា លទ្ធផលនៃការប្រឡងនឹងត្រូវបិទផ្សាយជាផ្លូវការនៅថ្ងៃទី២ ខែកញ្ញា ឆ្នាំ២០២៦ នៅតាមមណ្ឌលសំណេរនៃរាជធានី-ខេត្តទាំង២៥ នៅទូទាំងព្រះរាជាណាចក្រកម្ពុជា ដើម្បីឱ្យបេក្ខជន និងអាណាព្យាបាលបានជ្រាបជាសាធារណៈ។

នៅក្នុងរបាយការណ៍បូកសរុបលទ្ធផលរួម បេក្ខជនដែលបានប្រឡងជាប់មានចំនួនសរុប ១២៥ ៩៧៥ នាក់ ដែលស្មើនឹង ៨៤.០៦ ភាគរយនៃចំនួនបេក្ខជនដែលបានមកប្រឡងជាក់ស្តែង។ តួលេខនេះបង្ហាញពីនិន្នាការវិជ្ជមាននៃសមត្ថភាពរបស់សិស្សានុសិស្ស បន្ទាប់ពីឆ្លងកាត់ការសិក្សាយ៉ាងសកម្មក្នុងឆ្នាំសិក្សាកន្លងទៅ។

ចំពោះចំណាត់ថ្នាក់តាមកម្រិតនិទ្ទេសដែលបេក្ខជនទទួលបាន រួមមាន៖ និទ្ទេស A ចំនួន ២ ០២២ នាក់, និទ្ទេស B ចំនួន ៨ ៨៤៨ នាក់, និទ្ទេស C ចំនួន ២៣ ៤២២ នាក់, និទ្ទេស D ចំនួន ៤៤ ៨៦៩ នាក់, និងនិទ្ទេស E ចំនួន ៤៦ ៨១៤ នាក់។ នេះជាសមិទ្ធផលផ្លែផ្កាថ្មីមួយទៀតសម្រាប់ការខិតខំប្រឹងប្រែងរបស់សិស្សានុសិស្ស លោកគ្រូអ្នកគ្រូ និងការគាំទ្រពីអាណាព្យាបាលសិស្សគ្រប់រូប។

ក្រសួងអប់រំ យុវជន និងកីឡា បានអំពាវនាវដល់សាធារណជន និងបេក្ខជនទាំងអស់ មេត្តាជ្រាបជាព័ត៌មាន និងត្រៀមខ្លួនពិនិត្យលទ្ធផលតាមកាលបរិច្ឆេទ និងទីតាំងដែលបានកំណត់ខាងលើ។

Share:

Author: sopheakdpdnews

Leave a Reply

Your email address will not be published. Required fields are marked *