ខេត្តមណ្ឌលគិរី៖នៅព្រឹកថ្ងៃទី០២ ខែកញ្ញា ឆ្នាំ២០២៦ នេះ រដ្ឋបាលខេត្តមណ្ឌលគិរី បានរៀបចំទទួលម៉ូតូចំនួន ៥គ្រឿង ដែលជាអំណោយលើកទឹកចិត្តរបស់ឯកឧត្តម គង់ គឹមនី អភិបាលនៃគណៈអភិបាលខេត្ត ដើម្បីត្រៀមប្រគល់ជូនដល់ក្មួយៗសិស្សានុសិស្ស ដែលបានខិតខំប្រឹងប្រែងរហូតទទួលបានលទ្ធផលជាប់និទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងឆ្នាំ២០២៦។
យោងតាមសេចក្ដីរាយការណ៍ពីរដ្ឋបាលខេត្តមណ្ឌលគិរី ម៉ូតូទាំង ៥គ្រឿងនេះ ត្រូវបានដឹកជញ្ជូនមកដល់សាលាខេត្តជាស្រេច ដើម្បីត្រៀមរៀបចំពិធីប្រគល់ជូនសិស្សឆ្នើមទាំង ៥រូប ក្នុងពេលឆាប់ៗខាងមុខនេះ។ សកម្មភាពនេះគឺជាការឆ្លុះបញ្ចាំងពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត ចំពោះការបណ្ដុះបណ្ដាលធនធានមនុស្ស និងការជំរុញទឹកចិត្តដល់យុវជនជំនាន់ក្រោយឲ្យខិតខំក្រេបជញ្ជក់ចំណេះដឹង។
ឯកឧត្តម គង់ គឹមនី អភិបាលខេត្តមណ្ឌលគិរី បានមានប្រសាសន៍បង្ហាញពីមោទនភាពចំពោះក្មួយៗសិស្សានុសិស្សដែលបានតស៊ូជម្នះរាល់ការលំបាក រហូតដណ្ដើមបានជោគជ័យដ៏ត្រចះត្រចង់ជូនគ្រួសារ និងកិត្តិយសសម្រាប់ខេត្តទាំងមូល។ ការផ្ដល់រង្វាន់ជាមធ្យោបាយធ្វើដំណើរនាពេលនេះ នឹងក្លាយជាកម្លាំងចលករយ៉ាងសំខាន់សម្រាប់ក្មួយៗក្នុងការបន្តការសិក្សានៅថ្នាក់ឧត្តមសិក្សាបន្តទៀត។
សូមបញ្ជាក់ផងដែរថា សម្រាប់ការប្រឡងមធ្យមសិក្សាទុតិយភូមិក្នុងឆ្នាំ២០២៦នេះ ខេត្តមណ្ឌលគិរីមានបេក្ខជនដែលទទួលបាននិទ្ទេស A ចំនួន ៥នាក់ ដែលជាតួលេខមួយបង្ហាញពីវឌ្ឍនភាពនៃវិស័យអប់រំនៅក្នុងខេត្តប៉ូលសេដ្ឋកិច្ចទី៤ មួយនេះ ក្រោមការដឹកនាំ និងការយកចិត្តទុកដាក់ពីរដ្ឋបាលខេត្ត និងមន្ទីរអប់រំ យុវជន និងកីឡាខេត្ត។
ពិធីប្រគល់រង្វាន់ជាផ្លូវការ នឹងត្រូវប្រារព្ធឡើងក្នុងពេលដ៏ខ្លីខាងមុខ ក្រោមអធិបតីភាពដ៏ខ្ពង់ខ្ពស់របស់ឯកឧត្តមអភិបាលខេត្ត ដោយមានការចូលរួមពីមន្ត្រីពាក់ព័ន្ធ លោកគ្រូអ្នកគ្រូ និងអាណាព្យាបាលសិស្ស ដើម្បីអបអរសាទរ និងលើកទឹកចិត្តដល់ធនធានមនុស្សដ៏មានសក្ដានុពលរបស់ជាតិ។
