លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីក្នុងពិធីបុណ្យរំឭកឧបការគុណសម្ដេចព្រះមហាសង្ឃរាជ ជោតញ្ញាណោ ជួន ណាត លើកទី១៥ ដើម្បីតម្កើងតម្លៃអរិយធម៌ និងអត្តសញ្ញាណជាតិខ្មែរ

(ក្រុងសៀមរាប)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាអធិបតីដ៏ខ្ពង់ខ្ពស់ក្នុង «ទិវាបុណ្យរំឭកឧបការគុណ សម្ដេចព្រះមហាសង្ឃរាជ ជោតញ្ញាណោ ជួន ណាត និងក្រុមជំនុំព្រះត្រៃបិដកខ្មែរ លើកទី១៥» នាព្រឹកថ្ងៃទី១៤ ខែមីនា ឆ្នាំ២០២៦ នៅវត្តរាជបូណ៌ ក្រុងសៀមរាប ខេត្តសៀមរាប។ ពិធីបុណ្យដ៏មហោឡារិកនេះ ត្រូវបានរៀបចំឡើងក្នុងគោលបំណងសម្តែងនូវកតញ្ញុតាធម៌ដ៏ជ្រាលជ្រៅចំពោះវីរភាព ស្នាព្រះហស្ថ និងគុណូបការៈដ៏មហាសាលរបស់សម្តេចព្រះមហាសង្ឃរាជ និងអ្នកប្រាជ្ញខ្មែរ ដែលបានបូជាកម្លាំងកាយចិត្តក្នុងការថែរក្សាការពារមរតកអក្សរសាស្ត្រ និងព្រះពុទ្ធសាសនាខ្មែរឱ្យស្ថិតស្ថេរចីរកាល។

ជាការកត់សម្គាល់ ការរៀបចំពិធីនេះគឺជាការរំឭកនូវបេសកកម្មជាប្រវត្តិសាស្ត្រនៃការចងក្រងគម្ពីរព្រះត្រៃបិដកខ្មែរចំនួន ១១០ភាគ ដែលបានចាប់ផ្តើមតាំងពីឆ្នាំ១៩៣០ រហូតដល់ឆ្នាំ១៩៦៨។ បេសកកម្មដ៏លំបាកស្មុគស្មាញនេះ បានចំណាយពេលជិត ៤០ឆ្នាំ ទើបសម្រេចបានជាស្ថាពរ។ លក្ខណៈពិសេសអស្ចារ្យដែលធ្វើឱ្យគម្ពីរព្រះត្រៃបិដកខ្មែរមានតម្លៃលើសបណ្តាប្រទេសដទៃក្នុងពិភពលោក គឺការរៀបចំឱ្យមានទាំងភាសាបាលី (មគធៈភាសា) នៅទំព័រម្ខាង និងភាសាខ្មែរនៅទំព័រម្ខាងទៀត គ្រប់សន្លឹក និងគ្រប់ភាគទាំងអស់ ដែលនេះជាសក្ខីភាពបញ្ជាក់ពីចំណេះដឹងដ៏ជ្រៅជ្រះ និងភាពហ្មត់ចត់បំផុតរបស់លោកអ្នកប្រាជ្ញខ្មែរនាបុព្វកាល។

តាមរយៈការចូលរួមរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ពិធីនេះបានឆ្លុះបញ្ចាំងពីការយកចិត្តទុកដាក់ខ្ពស់របស់ថ្នាក់ដឹកនាំចំពោះ «ត្រៃកូដធម៌» ដែលរួមមាន ខន្តិ សច្ចៈ និងកតញ្ញូ។ គុណធម៌ទាំងនេះគឺជាគ្រឹះដ៏រឹងមាំនៃពូជសាសន៍ខ្មែរ ដែលជាពូជសាសន៍ថ្លៃថ្នូរ មានអារ្យធម៌រុងរឿងតាំងពីសម័យមហានគរ។ ការគោរពដឹងគុណចំពោះបុព្វការីជន គឺជាសកម្មភាពដ៏មានតម្លៃក្នុងវិស័យសីលធម៌សង្គម ដើម្បីបណ្តុះស្មារតីយុវជនជំនាន់ក្រោយឱ្យយល់ច្បាស់ពីតម្លៃនៃអក្សរសាស្ត្រ និងសាសនាដែលជាព្រលឹងជាតិ។

ក្រៅពីការចងក្រងព្រះត្រៃបិដក សម្ដេចព្រះមហាសង្ឃរាជ ជួន ណាត បានបន្សល់ទុកនូវ «វចនានុក្រមខ្មែរ» ដែលជាឧបករណ៍ដ៏សំខាន់បំផុតសម្រាប់ប្រជាជាតិខ្មែរក្នុងការសិក្សាស្រាវជ្រាវ។ ស្នាព្រះហស្ថដទៃទៀតរួមមាន សៀវភៅវេយ្យាករណ៍បាលី, គហិបតិបិត្ត, កាព្យលោកធម៌ និងអត្ថបទអប់រំជាច្រើនក្នុងទស្សនាវដ្តីកម្ពុជាសុរិយា។ អ្វីដែលកាន់តែពិសេស និងស្ថិតក្នុងបេះដូងកូនខ្មែរគ្រប់រូប គឺ «បទនគររាជ» ដែលជាភ្លេងជាតិខ្មែរ។ លើសពីវិស័យអក្សរសាស្ត្រ ព្រះអង្គក៏បានដឹកនាំកសាងហេដ្ឋារចនាសម្ព័ន្ធរូបវន្តជាច្រើនដូចជា វិហារ ស្ពាន សាលារៀន គិលានដ្ឋាន និងមន្ទីរសម្ភព ដើម្បីបម្រើផលប្រយោជន៍សាធារណៈ។

គួរបញ្ជាក់ថា ពិធីបុណ្យរយៈពេលពីរថ្ងៃនេះ បានចាប់ផ្តើមពីថ្ងៃទី១៣ ខែមីនា ជាមួយនឹងក្បួនធម្មយាត្រាដង្ហែព្រះត្រៃរ័ត្នជុំវិញក្រុងសៀមរាប ការសម្ដែងព្រះធម៌ទេសនា និងសិល្បៈចាប៉ីដងវែងនាពេលរាត្រី។ រហូតដល់ព្រឹកថ្ងៃទី១៤ ខែមីនា នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមជាមួយថ្នាក់ដឹកនាំខេត្ត និងពុទ្ធបរិស័ទជិតឆ្ងាយ បានអញ្ជើញចូលរួមក្នុងពិធីរាប់បាត្រប្រគេនព្រះសង្ឃចំនួន ៣៥០អង្គ ដើម្បីឧទ្ទិសកុសលថ្វាយចំពោះសម្ដេចព្រះមហាសង្ឃរាជ និងក្រុមជំនុំព្រះត្រៃបិដកខ្មែរ។

ពិធីបុណ្យនេះមិនត្រឹមតែជាកិច្ចបែបសាសនាប៉ុណ្ណោះទេ ប៉ុន្តែជាសារនយោបាយ និងវប្បធម៌ដ៏ខ្លាំងក្លាមួយ ក្នុងការបង្ហាញទៅកាន់ពិភពលោកថា កម្ពុជានៅតែបន្តរក្សា និងការពារមរតកបញ្ញាញាណរបស់បុព្វបុរសខ្លួនយ៉ាងខ្ជាប់ខ្ជួនបំផុត៕

Share:

Author: sopheakdpdnews

Leave a Reply

Your email address will not be published. Required fields are marked *