**សេចក្តីរាយការណ៍ព័ត៌មាន៖ រាជរដ្ឋាភិបាលអំពាវនាវឱ្យមានមហាសាមគ្គីជាតិ ដើម្បីការពារអធិបតេយ្យភាព និងបូរណភាពទឹកដី**

**ភ្នំពេញ៖** ក្នុងសន្និសីទសារព័ត៌មាននាថ្ងៃទី១៦ ខែមីនា ឆ្នាំ២០២៦ អ្នកនាំពាក្យរាជរដ្ឋាភិបាលកម្ពុជា បានសង្កត់ធ្ងន់ជាថ្មីនូវសារៈសំខាន់នៃមហាសាមគ្គីជាតិ និងការពង្រឹងភាពម្ចាស់ការលើខ្លួនឯង ដើម្បីធានាដល់ការការពារអធិបតេយ្យភាពជាតិ និងបូរណភាពទឹកដី ស្របតាមអនុសាសន៍ខ្ពង់ខ្ពស់របស់ប្រមុខដឹកនាំជាតិ។

យោងតាមប្រភពពីអ្នកនាំពាក្យរាជរដ្ឋាភិបាល កិច្ចប្រជុំនេះមានគោលបំណងរម្លឹកដល់ស្មារតីកូនខ្មែរគ្រប់រូប ឱ្យរួបរួមគ្នាជាធ្លុងមួយ ខណៈដែលប្រទេសជាតិកំពុងបន្តដំណើរលើវិថីអភិវឌ្ឍន៍ និងការការពារផលប្រយោជន៍ជាតិ។ អ្នកនាំពាក្យបានដកស្រង់ប្រសាសន៍របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា កាលពីឱកាសខួប ៤៧ ឆ្នាំនៃទិវាជ័យជំនះ ៧ មករា ដែលបានដាស់តឿនឱ្យពលរដ្ឋលើកកម្ពស់ស្មារតីស្នេហាជាតិ និងពង្រឹងភាពម្ចាស់ការ ដើម្បីជម្នះរាល់ឧបសគ្គទាំងឡាយ។

ក្នុងស្មារតីដដែលនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមសេចក្តីរាយការណ៍ ក៏បានអំពាវនាវដល់វីរយុទ្ធជន និងជនរួមជាតិឱ្យចងចាំនូវមេរៀនប្រវត្តិសាស្ត្រថា «បែកបាក់គឺស្លាប់ សាមគ្គីរឹងមាំគឺរស់»។ សម្តេចធិបតីបានសង្កត់ធ្ងន់ថា ការការពារបូរណភាពទឹកដី និងប្រជាជន គឺជាអាទិភាពខ្ពស់បំផុតរបស់រាជរដ្ឋាភិបាល។ ផ្អែកលើសុន្ទរកថាកាលពីថ្ងៃទី១០ ខែកុម្ភៈ ឆ្នាំ២០២៦ សម្តេចប្រមុខរាជរដ្ឋាភិបាលបានបង្ហាញក្តីសង្ឃឹមថា ប្រជាពលរដ្ឋនឹងបន្តផ្តល់ជំនឿទុកចិត្តលើរាជរដ្ឋាភិបាល ដើម្បីប្រែក្លាយតម្លៃនៃសន្តិភាពទៅជាកម្លាំងអភិវឌ្ឍន៍ជាតិឱ្យកាន់តែខ្លាំងក្លាលើឆាកអន្តរជាតិ។

ពាក់ព័ន្ធនឹងបញ្ហាព្រំដែន អ្នកនាំពាក្យរាជរដ្ឋាភិបាលបានបញ្ជាក់ច្បាស់នូវជំហរម៉ឺងម៉ាត់របស់កម្ពុជា ក្នុងការការពារខ្សែព្រំដែនអន្តរជាតិកម្ពុជា-ថៃ។ តាមការបញ្ជាក់ពីមន្ត្រីនាំពាក្យ កម្ពុជានឹងប្រកាន់ខ្ជាប់នូវគោលការណ៍ច្បាប់អន្តរជាតិ ជាពិសេសគោលការណ៍ខ្សែព្រំដែនមិនកែប្រែ (Uti Possidetis Juris) និងឯកសារប្រវត្តិសាស្ត្រនានា រួមមានអនុសញ្ញា និងសន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនដែលបន្សល់ទុកដោយគណៈកម្មការឥណ្ឌូចិន-សៀម។ ក្នុងន័យនេះ កម្ពុជាប្រកាសមិនទទួលស្គាល់រាល់ការកែប្រែខ្សែព្រំដែនណាមួយ ដែលកើតចេញពីការប្រើប្រាស់កម្លាំងបំពាននោះឡើយ។

ជាកិច្ចបញ្ចប់ អ្នកនាំពាក្យបានរម្លឹកដល់ការឈឺចាប់ និងការបែកបាក់ក្នុងអតីតកាល ជាពិសេសក្នុងរបបប្រល័យពូជសាសន៍ ដើម្បីជាមេរៀនដាស់ស្មារតីឱ្យកូនខ្មែរជំនាន់ក្រោយ រួបរួមគ្នាកសាងអនាគតដ៏រុងរឿង។ រាជរដ្ឋាភិបាលបានប្តេជ្ញាចិត្តបន្តដើរលើមាគ៌ាសន្តិភាព និងដំណោះស្រាយដោយសន្តិវិធី ដោយមិនធ្វើសម្បទាននូវអធិបតេយ្យភាព ឬសេចក្តីថ្លៃថ្នូររបស់ជាតិជាដាច់ខាត៕

–

Share:

Author: sopheakdpdnews

Leave a Reply

Your email address will not be published. Required fields are marked *