ជំងឺនីប៉ាហ៍ គឺជាជំងឺបង្កឡើងដោយវីរុសដ៏កាចសាហាវបំផុត ដែលមានអត្រាស្លាប់ខ្ពស់ចន្លោះពី ៤០% ទៅ ៧០%។ មេរោគនេះត្រូវបានផ្ទុកដោយសត្វប្រចៀវ សត្វចចើង និងជ្រូក ហើយអាចឆ្លងមកមនុស្សតាមរយៈការប៉ះពាល់ផ្ទាល់ជាមួយសត្វឈឺ ឬការទទួលទានអាហារដូចជា ទឹកត្នោត ឬផ្លែឈើដែលប្រឡាក់ដោយសត្វផ្ទុកមេរោគ។ វាក៏អាចឆ្លងពីមនុស្សម្នាក់ទៅមនុស្សម្នាក់ទៀតតាមរយៈទឹកសរីរាង្គផងដែរ។
អ្នកជំងឺដែលឆ្លងមេរោគនីប៉ាហ៍ ជាធម្មតាមានរោគសញ្ញាគ្រុនក្តៅ និងឈឺក្បាល មុននឹងវិវត្តទៅជាជំងឺរលាកខួរក្បាលធ្ងន់ធ្ងរ (Encephalitis) ដែលអាចបណ្តាលឲ្យសន្លប់យ៉ាងលឿនក្នុងរយៈពេល ២៤ ទៅ ៤៨ ម៉ោង។ ការផ្ទុះឡើងនៃជំងឺនេះ កើតមានញឹកញាប់នៅក្នុងតំបន់អាស៊ីខាងត្បូង ជាពិសេសប្រទេសបង់ក្លាដែស និងឥណ្ឌា ហើយធ្លាប់បង្កជាវិបត្តិធ្ងន់ធ្ងរនៅប្រទេសម៉ាឡេស៊ីកាលពីឆ្នាំ១៩៩៩។
រហូតមកដល់ពេលនេះ មិនទាន់មានករណីជំងឺនីប៉ាហ៍ត្រូវបានរកឃើញលើមនុស្សនៅក្នុងប្រទេសកម្ពុជានៅឡើយទេ។ ទោះជាយ៉ាងនេះក្តី នាយកដ្ឋានប្រយុទ្ធនឹងជំងឺឆ្លង (DCC) កំពុងយកចិត្តទុកដាក់តាមដាន និងត្រៀមលក្ខណៈឆ្លើយតបជាប្រចាំ ដើម្បីទប់ស្កាត់ការរាតត្បាត។
អាជ្ញាធរស្នើដល់សាធារណជនឲ្យអនុវត្តវិធានការការពារ ដោយលាងដៃជាមួយសាប៊ូជាប្រចាំ ចៀសវាងការប៉ះពាល់ផ្ទាល់ជាមួយសត្វឈឺ និងជៀសវាងការប៉ះពាល់ឈាម ឬសារធាតុរាវក្នុងរាងកាយរបស់អ្នកជំងឺដែលមានមេរោគ។
