(ព្រៃវែង)៖ នាព្រឹកថ្ងៃសៅរ៍ ទី២៩ ខែសីហា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មីចំនួន ១ខ្នង ដែលមាន ១២បន្ទប់ នៅវិទ្យាល័យ ហ៊ុន សែន ព្រែកសណ្តែក។
ពិធីនេះត្រូវបានរៀបចំឡើងនៅក្នុងបរិវេណវិទ្យាល័យ ហ៊ុន សែន ព្រែកសណ្តែក ស្ថិតក្នុងភូមិព្រែកសណ្តែក ឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង ដោយមានការអមដំណើរដោយលោកអភិបាលនៃគណៈអភិបាលខេត្តព្រៃវែង លោកស្នងការនគរបាលខេត្ត ព្រមទាំងមន្ត្រីរាជការ លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។
សមិទ្ធផលអគារសិក្សាថ្មីនេះ គឺជាការឆ្លើយតបទៅនឹងតម្រូវការជាក់ស្តែង និងដើម្បីលើកកម្ពស់វិស័យអប់រំនៅតាមមូលដ្ឋាន បង្កលក្ខណៈងាយស្រួលដល់ក្មួយៗសិស្សានុសិស្សក្នុងការសិក្សារៀនសូត្រឱ្យកាន់តែមានប្រសិទ្ធភាព ដើម្បីក្លាយជាសសរទ្រូងដ៏រឹងមាំសម្រាប់អភិវឌ្ឍប្រទេសជាតិទៅថ្ងៃអនាគត ស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា។
