ហេតុការណ៍នេះបានកើតឡើងកាលពីវេលាម៉ោង ១១:៣០ នាទីយប់ ថ្ងៃទី២៥ ខែមីនា ឆ្នាំ២០២៦ (យោងតាមប្រភពនៅកន្លែងកើតហេតុ) ដែលស្ថិតក្នុងតំបន់បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។
តាមសេចក្តីរាយការណ៍ព័ត៌មានបឋមបានឱ្យដឹងថា មុនពេលកើតហេតុ មាននារីមួយក្រុមបានចូលមកទទួលទានអាហារនៅក្នុងទីតាំងខាងលើតាមទម្លាប់ធម្មតា។ ក្នុងកំឡុងពេលនោះ ក៏មានបុរសម្នាក់បានដើរចូលទៅជល់កែវនៅតុមួយទៀតដែលស្ថិតនៅក្បែរតុរបស់ជនរងគ្រោះ។ ទោះជាយ៉ាងណា អ្វីដែលបង្កឱ្យមានការភ្ញាក់ផ្អើលខ្លាំងនោះ គឺនៅពេលដែលបុរសរូបនោះបានដើរត្រឡប់ទៅកាន់តុរបស់ខ្លួនវិញ បែរជាបានឆ្លៀតឱកាសប្រព្រឹត្តសកម្មភាពមិនសមរម្យ ដោយបានប៉ះពាល់ និងបំពានលើរូបរាងកាយផ្នែកខាងក្រោយនៃនារីរងគ្រោះទាំងពីររូបតែម្តង។
ភ្លាមៗក្រោយពីមានសកម្មភាពបំពាននេះកើតឡើង ស្ថានភាពនៅក្នុងហាងបានប្រែជាមានភាពវឹកវរ និងការតវ៉ាពីសំណាក់ជនរងគ្រោះ។ ក្រោយទទួលដំណឹងនេះ កម្លាំងកងរាជអាវុធហត្ថបានចុះមកអន្តរាគមន៍ដល់ទីតាំងកើតហេតុភ្លាមៗ ដើម្បីគ្រប់គ្រងស្ថានការណ៍ និងបានធ្វើការឃាត់ខ្លួនបុរសដែលបង្កហេតុខាងលើ រួចបញ្ជូនទៅកាន់មូលដ្ឋានកងរាជអាវុធហត្ថខណ្ឌដូនពេញ។
បច្ចុប្បន្ន ជនសង្ស័យកំពុងត្រូវបានមន្ត្រីជំនាញធ្វើការសាកសួរ និងកសាងសំណុំរឿងដើម្បីបន្តនីតិវិធីរដ្ឋបាលទៅតាមបទដ្ឋានច្បាប់ជាធរមាន។ ករណីនេះបានក្លាយជាប្រធានបទរិះគន់យ៉ាងខ្លាំងពីសំណាក់មហាជន ចំពោះសីលធម៌សង្គម និងសុវត្ថិភាពរបស់ស្ត្រីក្នុងទីសាធារណៈ ដែលទាមទារឱ្យមានការអនុវត្តច្បាប់យ៉ាងតឹងរ៉ឹងបំផុត ដើម្បីជាការព្រមានដល់បុគ្គលទាំងឡាយណាដែលមានចេតនាប្រព្រឹត្តអំពើអសុរោះបែបនេះ៕




















