យោងតាមការព្យាករណ៍បានឱ្យដឹងថា របបខ្យល់មូសុងឦសាននៅតែបន្តមានឥទ្ធិពលគ្របដណ្តប់លើតំបន់សមុទ្រចិនខាងត្បូង អាងទន្លេមេគង្គ តំបន់សមុទ្រកម្ពុជា ក៏ដូចជាលើព្រះរាជាណាចក្រកម្ពុជាទាំងមូល។ ស្ថានភាពអាកាសធាតុនេះ នឹងធ្វើឱ្យតំបន់នីមួយៗមានលក្ខណៈដូចខាងក្រោម៖
ទី១. សម្រាប់តំបន់វាលទំនាប៖ សីតុណ្ហភាពមធ្យមអប្បបរមាមានចាប់ពី ២២អង្សាសេ រហូតដល់សីតុណ្ហភាពមធ្យមអតិបរមា ៣៣អង្សាសេ។ ខ្យល់នឹងបក់មកពីទិសឧត្តរ និងទិសឦសាន ក្នុងល្បឿនមធ្យម ២ម៉ែត្រក្នុងមួយវិនាទី។ បណ្តាខេត្តទាំងអស់ក្នុងតំបន់នេះ ដូចជាខេត្តបន្ទាយមានជ័យ បាត់ដំបង សៀមរាប កណ្តាល និងរាជធានីភ្នំពេញ គឺពុំមានភ្លៀងធ្លាក់ឡើយ។
ទី២. សម្រាប់តំបន់ខ្ពង់រាប៖ សីតុណ្ហភាពមធ្យមអប្បបរមាមានចន្លោះពី ២១អង្សាសេ រហូតដល់សីតុណ្ហភាពមធ្យមអតិបរមា ៣២អង្សាសេ។ ខ្យល់នឹងបក់មកពីទិសឧត្តរ និងទិសឦសាន ក្នុងល្បឿនមធ្យម ៣ម៉ែត្រក្នុងមួយវិនាទី ដែលលឿនជាងតំបន់ដទៃ។ ខេត្តឧត្តរមានជ័យ ប៉ៃលិន ស្ទឹងត្រែង រតនគិរី មណ្ឌលគិរី ព្រមទាំងជួរភ្នំដងរែក និងតំបន់ជួរភ្នំក្រវាញ ក៏ពុំមានភ្លៀងធ្លាក់ផងដែរ។
ទី៣. សម្រាប់តំបន់មាត់សមុទ្រ៖ សីតុណ្ហភាពមធ្យមអប្បបរមាគឺ ២២អង្សាសេ និងសីតុណ្ហភាពមធ្យមអតិបរមា ៣៣អង្សាសេ។ ខ្យល់បក់មកពីទិសបូព៌ និងទិសអាគ្នេយ៍ ក្នុងល្បឿនមធ្យម ២ម៉ែត្រក្នុងមួយវិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ គឺពុំមានភ្លៀងធ្លាក់នោះទេ។ ទន្ទឹមនឹងនេះ កម្ពស់រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,០០ម៉ែត្រ។
អាស្រ័យដូចបានជម្រាបជូនខាងលើ ក្រសួងធនធានទឹក និងឧតុនិយម សូមអំពាវនាវដល់សាធារណជនទាំងអស់ មេត្តាជ្រាបជាព័ត៌មាន៕




















