(ត្បូងឃ្មុំ)៖ លោក អ៊ុន គីមម៉េង ចាងហ្វាងគេហទំព័រ «រស្មីកោះធំ» បានរងរបួសធ្ងន់ធ្ងរ បន្ទាប់ពីត្រូវបានក្រុមអ្នកកាងល្បែងស៊ីសងមួយក្រុម ព្រួតគ្នាបង្កហិង្សាមកលើរូបលោក ខណៈដែលលោកកំពុងចុះបំពេញបេសកកម្មប្រមូលព័ត៌មាន និងរាយការណ៍អំពីសកម្មភាពល្បែងស៊ីសងខុសច្បាប់ ស្ថិតក្នុងភូមិសាស្ត្រស្រុកមេមត់ ខេត្តត្បូងឃ្មុំ កាលពីថ្ងៃទី០២ ខែឧសភា ឆ្នាំ២០២៤ កន្លងទៅនេះ។ ករណីនេះបានបង្កឱ្យមានការរិះគន់យ៉ាងខ្លាំងពីសំណាក់មហាជន ចំពោះសុវត្ថិភាពរបស់អ្នកសារព័ត៌មាន និងប្រសិទ្ធភាពនៃការបង្ក្រាបល្បែងស៊ីសងក្នុងតំបន់។
យោងតាមការរៀបរាប់របស់ជនរងគ្រោះ លោក អ៊ុន គីមម៉េង បានឱ្យដឹងថា នៅវេលាថ្ងៃត្រង់ថ្ងៃកើតហេតុ លោកបានរកឃើញទីតាំងល្បែងស៊ីសងមួយកន្លែង ដែលកំពុងដំណើរការយ៉ាងគគ្រឹកគគ្រេងនៅក្នុងចម្ការកៅស៊ូ ស្ថិតក្នុងឃុំមេមត់ ស្រុកមេមត់។ ភ្លាមៗនោះ លោកបានរាយការណ៍ព័ត៌មានតាមទូរសព្ទទៅកាន់លោកអធិការនគរបាលស្រុកមេមត់ ដើម្បីសុំកិច្ចអន្តរាគមន៍។ ទោះជាយ៉ាងណា ក្នុងកំឡុងពេលរង់ចាំកម្លាំងសមត្ថកិច្ចមកដល់ ស្រាប់តែមានក្រុមអ្នកកាងល្បែងប្រមាណ ៦ ទៅ ៧ នាក់ (មានទាំងបុរស និងស្ត្រី) បានសម្រុកមកព្រួតវាយដំលើរូបលោក បណ្តាលឱ្យរងរបួសគ្រាំគ្រាពេញរាងកាយ។
ប្រភពពីប្រជាពលរដ្ឋក្នុងមូលដ្ឋានបានបង្ហើបថា ទីតាំងល្បែងស៊ីសងខាងលើ ត្រូវបានគេស្គាល់ថាជារបស់បុគ្គលម្នាក់ឈ្មោះ “តាលឹម” ដែលជាមេក្លោងល្បែងស៊ីសងដ៏មានឥទ្ធិពលម្នាក់ ប្រចាំតំបន់ភាគខាងកើតនៃខេត្តត្បូងឃ្មុំ ជាពិសេសក្នុងស្រុកមេមត់ និងស្រុកពញាក្រែក។ ទោះជាយ៉ាងនេះក្តី បុគ្គលឈ្មោះ តាលឹម បានបដិសេធតាមរយៈខ្សែទូរសព្ទដោយអះអាងថា លោកមិនបានដឹងឮអំពីដំណើរការល្បែងស៊ីសង ឬអំពើហិង្សាដែលបានកើតឡើងលើអ្នកសារព័ត៌មាននោះឡើយ។
ជុំវិញករណីនេះ លោក យ៉េន ស៊ីថា អធិការរងទទួលបន្ទុកការងារព្រហ្មទណ្ឌ នៃអធិការដ្ឋាននគរបាលស្រុកមេមត់ បានមានប្រសាសន៍ប្រាប់អ្នកសារព័ត៌មាននៅថ្ងៃទី០៥ ខែឧសភានេះថា លោកមិនទាន់ទទួលបានព័ត៌មានលម្អិតជុំវិញអំពើហិង្សានេះនៅឡើយទេ។ លោកបានបញ្ជាក់ថា៖ *«ខ្ញុំសូមអំពាវនាវឱ្យជនរងគ្រោះអញ្ជើញមកដាក់ពាក្យបណ្តឹងជាផ្លូវការ នៅអធិការដ្ឋាន ឬស្នងការដ្ឋាននគរបាលខេត្ត ដើម្បីឱ្យសមត្ថកិច្ចមានមូលដ្ឋានក្នុងការស្វែងរកយុត្តិធម៌ និងចាត់វិធានការតាមច្បាប់»*។ ទន្ទឹមនឹងនេះ លោកអធិការរងក៏បានទទួលស្គាល់ផងដែរថា ទីតាំងដែលអ្នកសារព័ត៌មានបានរាយការណ៍នោះ ពិតជាមានសកម្មភាពល្បែងស៊ីសងប្រាកដមែន។
បច្ចុប្បន្ន ជនរងគ្រោះបានដាក់ពាក្យបណ្តឹងទៅកាន់ស្នងការដ្ឋាននគរបាលខេត្តត្បូងឃ្មុំរួចរាល់ហើយ ដោយរំពឹងថានឹងមានការស៊ើបអង្កេតប្រកបដោយតម្លាភាព ដើម្បីវែកមុខជនបង្ក និងអ្នកពាក់ព័ន្ធមកផ្ដន្ទាទោសតាមច្បាប់។ មជ្ឈដ្ឋានទូទៅបានលើកឡើងថា សកម្មភាពល្បែងស៊ីសងកំពុងតែញាំញីសន្តិសុខសណ្តាប់ធ្នាប់ក្នុងសហគមន៍យ៉ាងខ្លាំង ខណៈដែលឥទ្ធិពលរបស់មេក្លោងល្បែងហាក់បីដូចជាកំពុងស្ថិតនៅពីលើការអនុវត្តច្បាប់របស់អាជ្ញាធរមូលដ្ឋានមួយចំនួន។
