(សមុទ្រអារ៉ាប់) – បញ្ជាការដ្ឋានកណ្តាលរបស់សហរដ្ឋអាមេរិក (CENTCOM) កាលពីពេលថ្មីៗនេះ បានបង្ហាញជាសាធារណៈនូវរូបភាពនៃយន្តហោះចម្បាំងបំបាំងកាយប្រភេទ F-35B Lightning II ខណៈដែលយុទ្ធោបករណ៍ដ៏ទំនើបនេះកំពុងត្រៀមលក្ខណៈប្រតិបត្តិការនៅលើនាវាចម្បាំង USS Tripoli (LHA 7) ក្នុងតំបន់សមុទ្រអារ៉ាប់។ ប្រតិបត្តិការនេះ គឺជាផ្នែកមួយនៃយុទ្ធសាស្ត្ររឹតបន្តឹងសន្តិសុខដែនសមុទ្រ ដើម្បីបិទខ្ទប់រាល់ការចេញ-ចូលរបស់នាវាដឹកជញ្ជូនទៅកាន់កំពង់ផែនានារបស់ប្រទេសអ៊ីរ៉ង់ សំដៅកាត់ផ្តាច់ទំនាក់ទំនងផ្លូវទឹករបស់ប្រទេសនេះជាមួយពិភពលោកខាងក្រៅ។
យោងតាមសេចក្តីថ្លែងការណ៍ផ្លូវការរបស់ CENTCOM នាវា USS Tripoli ដែលផ្ទុកទៅដោយនាវិក និងកងម៉ារីនប្រមាណ ៣,៥០០ នាក់ កំពុងឈរជើងយ៉ាងរឹងមាំនៅក្នុងសមុទ្រអារ៉ាប់ ដើម្បីអនុវត្តបេសកកម្មឡោមព័ទ្ធ និងត្រួតពិនិត្យនាវាដែលធ្វើចរាចរណ៍ឆ្ពោះទៅកាន់ និងចាកចេញពីកំពង់ផែរបស់អ៊ីរ៉ង់។ កងកម្លាំងអាមេរិកបានបញ្ជាក់ថា ការអនុវត្តវិធានការបិទខ្ទប់ផ្លូវសមុទ្រនេះ ត្រូវបានធ្វើឡើងដោយឈរលើគោលការណ៍ “មិនលំអៀង” ពោលគឺអនុវត្តចំពោះនាវាគ្រប់ប្រភេទមកពីគ្រប់បណ្តាប្រទេសទាំងអស់ ដោយគ្មានការលើកលែងចំពោះសញ្ជាតិនាវាណាមួយឡើយ ប្រសិនបើមានបំណងធ្វើពាណិជ្ជកម្មតាមផ្លូវទឹកជាមួយអ៊ីរ៉ង់ក្នុងអំឡុងពេលនេះ។
អ្នកវិភាគយោធាអន្តរជាតិបានលើកឡើងថា ការដាក់ពង្រាយយន្តហោះចម្បាំងបំបាំងកាយ F-35B ដែលមានសមត្ថភាពអាចហោះហើរ និងចុះចតក្នុងលក្ខណៈបញ្ឈរ (STOVL) នៅលើនាវា USS Tripoli នេះ គឺជាការបង្ហាញនូវសាច់ដុំយោធាដ៏មានឥទ្ធិពល និងជាសារព្រមានកម្រិតខ្ពស់។ គោលបំណងចម្បងនៃប្រតិបត្តិការនេះ គឺដើម្បីដាក់សម្ពាធសេដ្ឋកិច្ច និងនយោបាយជាអតិបរមាទៅលើទីក្រុងតេអេរ៉ង់ តាមរយៈការធ្វើឱ្យកំពង់ផែសមុទ្ររបស់ខ្លួនស្ថិតក្នុងស្ថានភាពឯកោទាំងស្រុង។
នៅក្នុងក្របខ័ណ្ឌនៃបេសកកម្មនេះ កងកម្លាំងអាមេរិកបានបង្ហាញនូវការត្រៀមលក្ខណៈរួចរាល់ជាស្រេចក្នុងកម្រិតខ្ពស់បំផុត (Full Readiness) សម្រាប់ការវាយលុកទាំងតាមអាកាស និងតាមសមុទ្រ។ ការរៀបចំយន្តហោះ F-35B ដែលជាបច្ចេកវិទ្យាចុងក្រោយបង្អស់របស់ពិភពលោក គឺជាការធានានូវឧត្តមភាពអាកាស ដើម្បីគាំទ្រដល់ប្រតិបត្តិការឡោមព័ទ្ធដែនទឹកដែលកំពុងបន្តយ៉ាងតានតឹង។
គួរបញ្ជាក់ថា ស្ថានភាពនៅតំបន់មជ្ឈិមបូព៌ា កំពុងស្ថិតក្នុងក្រសែភ្នែកតាមដានយ៉ាងយកចិត្តទុកដាក់ពីសំណាក់សហគមន៍អន្តរជាតិ ខណៈដែលការបិទខ្ទប់ផ្លូវសមុទ្រនេះ អាចនឹងជះឥទ្ធិពលដល់ខ្សែចង្វាក់ផ្គត់ផ្គង់ថាមពល និងស្ថិរភាពសន្តិសុខក្នុងតំបន់ទាំងមូល។




















