ចក្រភពអង់គ្លេសពង្រាយខែលការពារដែនអាកាស និងនាវាចម្បាំងទៅកាន់មជ្ឈិមបូព៌ា ដើម្បីការពារសម្ព័ន្ធមិត្ត និងពលរដ្ឋខ្លួន

[រាជធានីឡុងដ៍]៖ លោក គីយើ ស្តាម័រ (Keir Starmer) នាយករដ្ឋមន្ត្រីនៃចក្រភពអង់គ្លេស បានប្រកាសជាផ្លូវការនូវការបង្កើនវត្តមានយោធាយ៉ាងខ្លាំងក្លានៅក្នុងតំបន់មជ្ឈិមបូព៌ា និងសមុទ្រមេឌីទែរ៉ាណេ ដើម្បីពង្រឹងកិច្ចការពារសន្តិសុខដល់សម្ព័ន្ធមិត្ត និងពលរដ្ឋអង់គ្លេសដែលកំពុងស្នាក់នៅក្នុងតំបន់នោះ។

យោងតាមសេចក្តីថ្លែងការណ៍របស់លោកនាយករដ្ឋមន្ត្រី វិធានការសំខាន់ៗដែលត្រូវអនុវត្តរួមមាន៖

  • ការពង្រាយកម្លាំងអាកាស៖ បញ្ជូនយន្តហោះចម្បាំងប្រភេទ Typhoon ចំនួន ៤ គ្រឿងបន្ថែមទៀតទៅកាន់ប្រទេសកាតា។

  • ការពង្រាយកម្លាំងឧទ្ធម្ភាគចក្រ៖ បញ្ជូនឧទ្ធម្ភាគចក្រប្រភេទ Wildcat ដែលមានសមត្ថភាពខ្ពស់ក្នុងការកម្ទេចដ្រូន (Drone) ទៅកាន់ប្រទេសគីប្រឺស (Cyprus) នៅថ្ងៃស្អែកនេះ។

  • ការពង្រាយកម្លាំងជើងទឹក៖ បញ្ជូននាវាចម្បាំង HMS Dragon ទៅកាន់ដែនសមុទ្រមេឌីទែរ៉ាណេ។

ជាមួយគ្នានេះដែរ លោក ស្តាម័រ បានបញ្ជាក់ថា រដ្ឋាភិបាលអង់គ្លេសបានអនុញ្ញាតឱ្យសហរដ្ឋអាមេរិកប្រើប្រាស់មូលដ្ឋានទ័ពរបស់ខ្លួន សម្រាប់ការបំពេញ «ប្រតិបត្តិការការពារ» នានាផងដែរ។

លោកនាយករដ្ឋមន្ត្រីបានសង្កត់ធ្ងន់ថា៖ «យើងនឹងរក្សាខែលការពារនេះឱ្យបានរឹងមាំបំផុតសម្រាប់ប្រជាជនអង់គ្លេសនៅក្នុងតំបន់ ក៏ដូចជាសម្រាប់សម្ព័ន្ធមិត្តរបស់យើង»។

ក្រៅពីកិច្ចការការពារ លោកបានបន្ថែមថា រដ្ឋាភិបាលកំពុងខិតខំប្រឹងប្រែងជារៀងរាល់ថ្ងៃ ដើម្បីពង្រឹងប្រព័ន្ធសុវត្ថិភាព និងត្រៀមលក្ខណៈជម្លៀសពលរដ្ឋចេញពីតំបន់ឈូងសមុទ្រពែរ្សក្នុងករណីចាំបាច់។ រហូតមកដល់ពេលនេះ មានប្រជាពលរដ្ឋជាង ១៤០,០០០ នាក់ហើយ ដែលបានចុះឈ្មោះស្នាក់នៅជាមួយរដ្ឋាភិបាលអង់គ្លេសនៅក្នុងតំបន់នោះ ដើម្បីងាយស្រួលក្នុងការទទួលជំនួយ និងការការពារ៕


រក្សាសិទ្ធិដោយ៖ KPD News

Share:

Author: sopheakdpdnews

Leave a Reply

Your email address will not be published. Required fields are marked *