ស្វែងរកឃើញហើយ! អ្នកនាំពាក្យរងក្រសួងមហាផ្ទៃ បំភ្លឺជុំវិញករណីយុវតីជនជាតិសិង្ហបុរី បន្ទាប់ពីមានបណ្ដឹងសុំអន្តរាគមន៍ពីក្រុមគ្រួសារ

[ភ្នំពេញ, ថ្ងៃទី០១ ខែសីហា ឆ្នាំ២០២៦ | ម៉ោង ១៦:៥១] – យោងតាមការបញ្ជាក់ជាផ្លូវការពីលោក ទូច សុឃៈ អ្នកនាំពាក្យរងក្រសួងមហាផ្ទៃ បានឱ្យដឹងថា កងកម្លាំងសមត្ថកិច្ចកម្ពុជាបានស្វែងរកឃើញយុវតីជនជាតិសិង្ហបុរីម្នាក់ ដែលបានបាត់ដំណឹងកន្លងមក បន្ទាប់ពីទទួលបានបណ្ដឹងសុំអន្តរាគមន៍ជាបន្ទាន់ពីសំណាក់អាណាព្យាបាលរបស់នាង។

កិច្ចប្រតិបត្តិការស្រាវជ្រាវនេះ ត្រូវបានធ្វើឡើងយ៉ាងយកចិត្តទុកដាក់បំផុត ក្រោមការសហការរវាងអគ្គនាយកដ្ឋានអន្តោប្រវេសន៍ និងស្នងការដ្ឋាននគរបាលរាជធានីភ្នំពេញ។ ជាលទ្ធផល នាពេលថ្មីៗនេះ មន្ត្រីនគរបាលជំនាញបានរកឃើញយុវតីរូបនោះ កំពុងស្នាក់នៅក្នុងអគារខុនដូមួយកន្លែងក្នុងរាជធានីភ្នំពេញ ដោយមានសុវត្ថិភាពពេញលេញ។

តាមរយៈការសាកសួរ និងការបញ្ជាក់ដោយផ្ទាល់ពីសាមីខ្លួន យុវតីជនជាតិសិង្ហបុរីរូបនេះបានអះអាងថា ខ្លួនមិនបានរងគ្រោះដោយអំពើជួញដូរមនុស្ស ការបង្ខាំងទុកដោយខុសច្បាប់ ឬការធ្វើទារុណកម្មណាមួយដូចជាការព្រួយបារម្ភនោះឡើយ។ មូលហេតុដែលនាំឱ្យនាងធ្វើដំណើរមកកាន់ព្រះរាជាណាចក្រកម្ពុជា និងកាត់ផ្ដាច់ប្រព័ន្ធទំនាក់ទំនងជាមួយក្រុមគ្រួសារ គឺដោយសារតែបញ្ហាវិវាទផ្ទៃក្នុងគ្រួសារតែប៉ុណ្ណោះ។

លោកអ្នកនាំពាក្យរងបានគូសបញ្ជាក់បន្ថែមថា នេះជាករណីឯកជនដែលពាក់ព័ន្ធនឹងបញ្ហាគ្រួសារ ហើយបច្ចុប្បន្ន យុវតីរូបនេះកំពុងស្ថិតក្រោមការយកចិត្តទុកដាក់ និងការសម្របសម្រួលពីមន្ត្រីជំនាញ ដើម្បីធានាបាននូវសុវត្ថិភាព និងបន្តនីតិវិធីរដ្ឋបាលពាក់ព័ន្ធផ្សេងៗ មុននឹងប្រគល់ជូនក្រុមគ្រួសារវិញ។

ជោគជ័យនៃប្រតិបត្តិការនេះ បានបង្ហាញឱ្យឃើញពីសមត្ថភាព និងការទទួលខុសត្រូវខ្ពស់របស់កងកម្លាំងនគរបាលជាតិកម្ពុជា ក្នុងការឆ្លើយតបទៅនឹងបណ្ដឹងសុំអន្តរាគមន៍ពីគ្រប់មជ្ឈដ្ឋាន ជាពិសេសការការពារសុវត្ថិភាពជនបរទេសដែលកំពុងស្នាក់នៅក្នុងប្រទេសកម្ពុជា ស្របតាមច្បាប់ជាធរមាន៕

Share:

Author: sopheakdpdnews

Leave a Reply

Your email address will not be published. Required fields are marked *