អាជ្ញាធរស្រុកអង្គរបូរីចុះអនុវត្តវិធានការរុះរើសំណង់ដែលចោទថាខុសច្បាប់ ខណៈម្ចាស់ផ្ទះអះអាងថាមានលិខិតកាន់កាប់ត្រឹមត្រូវ

រដ្ឋបាលស្រុកអង្គរបូរី កាលពីថ្ងៃទី០៩ ខែឧសភា ឆ្នាំ២០២៤ បានដឹកនាំកម្លាំងចុះអនុវត្តវិធានការរុះរើសំណង់ផ្ទះស្នាក់នៅមួយកន្លែង ដែលត្រូវបានអាជ្ញាធរចាត់ទុកថាជាសំណង់ខុសច្បាប់។ ចំណាត់ការនេះបានបង្កើតឱ្យមានការជជែកដេញដោលជាសាធារណៈ ក្រោយពេលម្ចាស់សំណង់បានចេញមុខអះអាងពីភាពមិនប្រក្រតីនៃនីតិវិធីរដ្ឋបាល។

យោងតាមការចុះផ្សាយលើទំព័រហ្វេសប៊ុកផ្លូវការរបស់រដ្ឋបាលស្រុកអង្គរបូរី បានឱ្យដឹងថា ការចុះរុះរើនេះត្រូវបានធ្វើឡើងបន្ទាប់ពីអាជ្ញាធរបានអះអាងថា បានធ្វើការជូនដំណឹងជាច្រើនលើកទៅកាន់ម្ចាស់សំណង់ ប៉ុន្តែមិនមានការសហការ ទើបឈានដល់ការអនុវត្តវិធានការរដ្ឋបាលបែបនេះ។

ផ្ទុយទៅវិញ បើតាមការរៀបរាប់ពីម្ចាស់សំណង់ដែលរងការរុះរើ បានបង្ហាញការសោកស្តាយ និងហួសចិត្តចំពោះចំណាត់ការនេះ ដោយលោកបានអះអាងថា កាលពីថ្ងៃទី០៨ ខែឧសភា លោកទើបតែទទួលបានការហៅទូរស័ព្ទពីអាជ្ញាធរឃុំ ដើម្បីឱ្យផ្អាកការសាងសង់ជាបណ្តោះអាសន្នប៉ុណ្ណោះ ដោយមិនទាន់មានលិខិតរដ្ឋបាលជាលាយលក្ខណ៍អក្សរផ្លូវការណាមួយឡើយ។ ប៉ុន្តែជាការកត់សម្គាល់ នៅថ្ងៃបន្ទាប់ ពោលគឺថ្ងៃទី០៩ ខែឧសភា អាជ្ញាធរស្រុកបានដឹកនាំកម្លាំងចុះមកអនុវត្តការរុះរើ និងវាយកម្ទេចសំណង់របស់លោកតែម្តង។

ដើម្បីជាភស្តុតាងបញ្ជាក់ពីភាពស្របច្បាប់ ម្ចាស់សំណង់ខាងលើបានបង្ហាញឯកសារមួយច្បាប់ ដែលជា «លិខិតស្នើសុំកាន់កាប់ប្រើប្រាស់ដីធ្លី» មានការចុះហត្ថលេខា និងបោះត្រាទទួលស្គាល់ដោយលោក ណុប ឌល មេឃុំព្រែកផ្ទោល កាលពីថ្ងៃទី១៦ ខែមីនា ឆ្នាំ២០២២ កន្លងទៅ។

ផ្អែកលើភាពផ្ទុយគ្នារវាងការអះអាងរបស់រដ្ឋបាលស្រុក និងឯកសារដែលម្ចាស់ដីមាននៅក្នុងដៃ សាធារណជន ក៏ដូចជាម្ចាស់សំណង់ផ្ទាល់ បានទទូចស្នើសុំឱ្យអាជ្ញាធរពាក់ព័ន្ធ មេត្តាជួយធ្វើការបកស្រាយ និងពិនិត្យលើករណីនេះឱ្យបានហ្មត់ចត់ ដើម្បីធានានូវតម្លាភាព និងយុត្តិធម៌ស្របតាមនីតិវិធីច្បាប់ ជៀសវាងការរិះគន់លើការអនុវត្តតួនាទីរបស់មន្ត្រីមូលដ្ឋាន។

Share:

Author: sopheakdpdnews

Leave a Reply

Your email address will not be published. Required fields are marked *