**អភិបាលខេត្តព្រៃវែង និងភារធារីស្ថានទូតចិន អញ្ជើញសម្ពោធដាក់ឱ្យប្រើប្រាស់អគារសិក្សាថ្មី និងបន្តចុះពិនិត្យមន្ទីរពេទ្យបង្អែកស្រុកកំពង់ត្របែក**

**(ព្រៃវែង)៖** នាព្រឹកថ្ងៃទី២៣ ខែតុលា ឆ្នាំ២០២៦ ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង រួមជាមួយលោក ជាំង ណាន (JIANG Nan) ភារធារី (Charge d’Affaires) នៃស្ថានទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី ១ខ្នង កម្ពស់ ៤ជាន់ និងសមិទ្ធផលនានា នៅក្នុងសាលារៀនខ្មែរ-ចិនជុងទី។

យោងតាមរបាយការណ៍ពីមន្ត្រីរដ្ឋបាលខេត្ត សមិទ្ធផលដែលត្រូវបានដាក់សម្ពោធនាឱកាសនេះ រួមមានអគារសិក្សាថ្មីសន្លាងដែលមានកម្ពស់ ៤ជាន់ ស្មើនឹង ២០បន្ទប់ ស្ថិតនៅក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង។ កម្មវិធីនេះក៏មានការនិមន្តចូលរួមពីព្រះសង្ឃ និងវត្តមានរបស់ឯកឧត្តម លោកជំទាវ អភិបាលរងខេត្ត លោកនាយក-នាយករងរដ្ឋបាលសាលាខេត្ត កងកម្លាំងប្រដាប់អាវុធទាំងបីប្រភេទ ប្រធានមន្ទីរ-អង្គភាពជុំវិញខេត្ត រដ្ឋបាលក្រុង-ស្រុកទាំង១៣ លោកគ្រូអ្នកគ្រូ សិស្សានុសិស្ស ព្រមទាំងបងប្អូនប្រជាពលរដ្ឋយ៉ាងច្រើនកុះករ។

ក្នុងពិធីនោះ ឯកឧត្តមអភិបាលខេត្ត និងតំណាងស្ថានទូតចិន បានបង្ហាញនូវការវាយតម្លៃខ្ពស់ចំពោះសមិទ្ធផលថ្មីនេះ ដែលនឹងក្លាយជាផ្នែកមួយយ៉ាងសំខាន់ក្នុងការលើកកម្ពស់វិស័យអប់រំ និងការបណ្តុះបណ្តាលធនធានមនុស្សនៅក្នុងមូលដ្ឋាន ស្របតាមកិច្ចសហប្រតិបត្តិការដ៏ជិតស្និទ្ធរវាងកម្ពុជា និងចិន។

បន្ទាប់ពីបញ្ចប់ពិធីសម្ពោធដាក់ឱ្យប្រើប្រាស់អគារសិក្សា ឯកឧត្តម សួន សុម៉ាលីន រួមជាមួយក្រុមការងារដឹកនាំខេត្ត ក៏បានបន្តដំណើរចុះពិនិត្យវឌ្ឍនភាពការងារនៅមន្ទីរពេទ្យបង្អែកស្រុកកំពង់ត្របែកផងដែរ។ ការចុះពិនិត្យនេះ ធ្វើឡើងក្នុងគោលបំណងតាមដានស្ថានភាពទូទៅនៃការផ្តល់សេវាសុខាភិបាលជូនប្រជាពលរដ្ឋ និងស្វែងយល់ពីតម្រូវការចាំបាច់នានា ដើម្បីបន្តអភិវឌ្ឍន៍គុណភាពនៃការព្យាបាល និងថែទាំសុខភាពក្នុងតំបន់ឱ្យកាន់តែប្រសើរឡើង។

រដ្ឋបាលខេត្តព្រៃវែងបានបញ្ជាក់ថា ការពង្រឹងវិស័យអប់រំ និងសុខាភិបាល គឺជាអាទិភាពចម្បងក្នុងការឆ្លើយតបទៅនឹងតម្រូវការរបស់ប្រជាពលរដ្ឋ និងការអភិវឌ្ឍសង្គម-សេដ្ឋកិច្ចក្នុងខេត្តទាំងមូល។

**រាយការណ៍ដោយ៖ ក្រុមការងារ KPDNEWS**

Share:

Author: sopheakdpdnews

Leave a Reply

Your email address will not be published. Required fields are marked *